Disa ditë pas skandalit të publikimit të pagave, numrave të telefonit dhe targave të mbi 600 mijë shqiptarëve, Partia Demokratike ka reaguar sërish duke i kërkuar SPAK të përshpejtojë hetimet.
Nënkryetari i kësaj force politike, Enkelejd Alibeaj tha në një deklaratë për mediat, se kjo është një ngjarje e rëndë dhe qytetarët kanë të drejtë të dinë se çfarë po ndodh me hetimet.
Deputeti demokrat kujton gjithashtu skandalin e patronazhistëve për zgjedhjet e 25 prillit, për të cilin SPAK ende nuk ka asnjë autor. Sipas tij, kjo ndodh sepse qeveria ka ndërhyrë në sistemin e drejtësisë.
“Përgjegjësia bie dhe mbi SPAK, institucioni që duhet te kishte hetuar me seriozitet dhe deri me fund skandalin me të dhënat personale të qytetarëve që Partia Socialiste përdori nëpërmjet patronazhistëve për zgjedhjet e 25 prillit. Vënia para përgjegjësisë e autorëve të vërtetë të skandalit të patronazhistëve, do të ishte shenjë e seriozitetit të hetimeve për një nga aktet që shënoi një nga kulmet e masakrës zgjedhore të 25 prillit. Por kur SPAK hesht, është e qartë se manipulatorët e politikës nuk frikësohen të zgjasin duart dhe të ndërhyjnë atje ku çdo shqiptar i ka besuar shtetit të dhënat e tij personale. Është e qartë që ideatorët dhe zbatuesit e skemës së publikimit të të dhënave personale të qytetarëve shqiptarë, si në rastin e patronazhistëve ashtu dhe në atë të disa ditëve më parë, është kupola e korruptuar e partisë shtet, e aftë për të përdorur çdo mënyrë dhe mjet në funksion në interesit personal”, shkruan Alibeaj.
Ndër të tjera, ai shprehet se shqiptarët po presin përgjigje nga drejtësia, sepse mungesa e ndëshkimit të autorëve, po kthehet në kërcënim të drejtpërdrejtë për jetët e tyre.
Discussion about this post