Rrjedhja e informacionit dhe publikimi i të dhënave sensitive të qytetarëve shqiptar nuk ka ende një përgjegjës, ndonëse raste të tilla janë të përsëritura dhe kanë shkaktuar mjaft indinjatë tek qytetarët, të cilët akuzojnë organet kompetente si të paaftë në funksionimin e tyre për mbrojtjen e të dhënave. Ministri i Mbrojtjes Niko Peleshi, ka zgjedhur të reagojë lidhur me këtë çështje, ndonëse disa ditë pas publikimit të skandaleve me të dhënat, duke u shprehur se ky është një kërcënim botëror në të cilin duhet investuar.
“Na duhet të investojmë më shumë, më mirë, jo vetëm ne por të gjithë vendet për të rritur sigurinë kibernetike. Ndaj ne jemi pjesë e një kërcënimi të madh botëror,” tha Peleshi.
Peleshi theksoi se Shqipëria do të pajiset me një njësi ushtarake që do të mbrojë këto të dhëna nga sulmet kibernetike, ndaj për këtë do të duhet një investim prej 20 milionë euro, në partneritet me SHBA-në.
“Një projekt shumë të madh, nuk ka pse mos e them, me partnerët tanë amerikanë mbi 20 mln euro po ngremë njësinë ushtarake të mbrojtjes kibernetike, gjë që do te jetë një garanci shumë e madhe,” tha Peleshi.
Në të njëjtën kohë banorët e Kuçovës kundërshtojnë ngritjen e një baze të tillë ushtarake, pasi pretendojnë se nuk iu janë ofruar shpronësime me të njëjtën vlerë me tregun.
Discussion about this post