Deputeti i Partisë Demokratike, Helidon Bushati ka denoncuar sipas tij një tjetër skandal korrupsioni në Unazën e Madhe të Tiranës, ku thotë se fituesit e 7 loteve të Unazës, janë të paracaktuara. Bushati shkruan në Facebook se procedurat tenderuese janë mbyllur me 15 shtator dhe ARRSH-ja, vonon të shpallë rezultatet.
“Unaza e Madhe, është kthyer në një mal të vërtetë korrupsioni, ku ARRSH ushqen me miliarda klientët e qeverisë. Fituesit e 7 lotëve të Unazës, duken qartë se janë të paracaktuar. Procedurat tenderuese janë mbyllur me 15 shtator dhe ARRSH-ja, vonon të shpallë rezultatet”, shkruan ai.
Deputeti demokrat shkruan se kriteret për tenderat janë vendosur me qëllim që të arrihen vetëm nga fituesit e paracaktuar. Ai jep si shembull lotin e parë ku thotë se në lotin e parë që ka vlerë më të madhe, ka 145 punonjës, ndërsa në të dytin ka 250 punonjës.
“Tenderat e Unazës së Madhe, janë një pazar i shëmtuar i ARRSH-së me kompanitë në pronësi të njerëzve të lidhur me qeverinë. 7 segmente rrugore të njëpasnjëshme, nga të gjitha anët janë të ngjashëm njeri me tjetrin por kriteret e vendosura janë jashtëzakonisht të ndryshme nga njëri tjetri, kritere që plotësohen vetëm nga fituesit e paracaktuar. Kështu në Lotin 1, i cili është edhe ai që ka vlerën më të madhe prej 2.5 miliard lekë të reja, është edhe loti i cili në absolut kërkohet numri më i ulët i punonjësve 145, stafit kryesor 6, kamionëve 10 dhe 6 eskavatorëve. Ndërkohë që në lotin 6 që ka vlerën më të ulët, 1.8 miliard lekë të reja, kërkohen 250 punonjës, 9 staf kryesor, 21 kamiona dhe 9 eskavatore”, shkruan ai.
Në fund ai shprehet i indinjuar se ndërsa vendi po zhytet në varfëri, qeveria ndan tendera për kompanitë që zhvasin paratë e qytetarëve.
