Gjykata e Posaçme kundër Krimit dhe Korrupsionit ka kaluar për gjykim dosjen për tenderin e uniformave të Policisë së Shtetit, në ngarkim të 10 zyrtarëve dhe ish-zyrtarëve të Ministrisë së Brendshme, të cilët akuzohen për shkelje të barazisë në tendera dhe shpërdorim të detyrës.
Ata do të gjykohen me procedurat e gjykimit të shkurtuar dhe në fund do ju ulet 1/3 e dënimit përfundimtar nga gjykata, teksa në datën 26 Nëntor ora 12:00 pritet të mbahet seanca e parë në themel.
“Koka” e grupit dyshohet se është Edlira Naqellari, ish-drejtoresha e Prokurorimeve Publike. Ajo u shkarkua nga detyra më 2 korrik 2021 nga ministri aktual, Bledi Çuçi. Naqellari akuzohet se bashkë me 8 vartësit e saj, anëtarë të Komisionit të Vlerësimit të Ofertave, KVO, kanë shkelur barazinë në tendera dhe i kanë dhënë në mënyrë të parregulltë 2.8 miliardë lekë kompanisë D&E Shpk, që fitoi tenderin.
Gjatë hetimit rezultoi e provuar sipas SPAK se 4 operatorët ekonomikë që u shpallën fitues nuk i plotësonin kriteret për të fituar tenderin.
Prokuroria thekson në dosjen hetimore se ata kishin ndryshuar spacifikimet për uniformat e policisë, ku një uniformë për femra kushtonte më shumë se ajo e burrave, uniformat dimërore ishin më të lira se ato verore dhe gjithashtu kishte mangësi në sasinë e produkteve.
Discussion about this post