Kryetarja e LSI, Monika Kryemadhi ka reaguar me tone të ashpra pas mbledhjes së Komisionit Hetimor për Inceneratorët, duke e cilësuar skandaloz faktin që sipas saj Komisioni nuk u lejua të merrte në pyetje Komisionin e dhënies me Koncesion të inceneratorit të Elbasanit me arsyetimin se kanë marrëveshje me SPAK për ruajtjen e sekretit hetimor.
Në një postim në “Facebook”, Kryemadhi sulmon dhe kryetaren e komisionit, deputeten Jorida Tabaku, teksa thekson se ajo duhet të mos kishte lejuar në asnjë moment, heqjen e kamerave që siguronin transparencën për publikun.
“Skandaloze! Me urdhër politik, Komisioni Hetimor Parlamentar nuk u lejua të merrte në pyetje Komisionin e dhënies me Koncesion të inceneratorit të Elbasanit me arsyetimin qesharak: Marrëveshje me SPAK (për ruajtjen e sekretit hetimor). Analiza e veprimtarisë apo deklaratat e z. Pëllumb Abeshi, si Kryetar i Komisionit të Dhënies me Koncesion, si dhe anëtarëve të tjerë të Komisionit, do të zbardhnin qartazi për publikun shkeljet e rënda proceduriale, që sipas Kryeministrit Rama nuk ekzistojnë.
Kryetarja e Komisionit duhet të mos kishte lejuar në asnjë moment, heqjen e kamerave që siguronin transparencën për publikun. Komisioni Hetimor me çfarë duket do të përfundojë thjesht me dëshmitarë që nuk dëshmojnë, apo që nuk do mbajnë mend, se çfarë ka ndodhur. Për Elbasanin, Fierin, Tiranën, topi tashmë është në fushën e SPAK! Inkurajoj çdo prokuror dhe gjyqtar, që ta shohin të vërtetën siç është, pa marrë parasysh funksionet apo përkatësitë politike të individëve nën hetim”, shkruan Kryemadhi.
Teksa shprehet se do të vijojë të zbardhë të vërtetën, Kryemadhi shprehet se është në dispozicion të çdo institucioni, për të dëshmuar me fakte, me prova, me zë e me figurë, të vërtetën e kësaj afere.
Discussion about this post