Një 58-vjeçare ka rënë në prangat e Policisë së Tiranës, ndërsa një 27-vjeçare po hetohet në gjendje të lirë, pasi dyshohet se ishin përfshirë në një skemë mashtrimi lidhur me zgjidhjen e problematikave të pronësisë.
Sipas hetimeve, 58-vjeçarja me iniciale S.D. kontaktonte persona që kishin probleme me dokumentacionin e pronave dhe u premtonte se, përmes njohjeve që pretendonte se kishte në Agjencinë Shtetërore të Kadastrës, mund t’u siguronte zgjidhjen e çështjeve të tyre.
Për të bindur qytetarët, ajo dyshohet se u siguronte edhe dokumente të falsifikuara. Në këtë mënyrë, sipas Policisë, dy gratë kanë përfituar në mënyrë të paligjshme një shumë që kalon 100 mijë euro.
Hetimi nisi pas informacionit të siguruar nga gazetarët e emisionit investigativ “STOP”, të cilët kishin marrë të dhëna nga persona që pretendonin se ishin pajisur me dokumente false dhe ishin mashtruar nga 58-vjeçarja.
Gjatë operacionit “Premtimi”, Policia sekuestroi një shumë parash në euro, që dyshohet se rrjedh nga veprimtaria kriminale, disa certifikata të dyshuara të falsifikuara dhe dy telefona celularë.
Për bashkëpunëtoren e dyshuar, 27-vjeçaren S.N., është nisur procedimi penal në gjendje të lirë.
Tiranë/Finalizohet operacioni i koduar “Premtimi”.
Dyshohet se kanë përvetësuar mbi 100 000 euro, duke mashtruar qytetarë, se do të ndërhynin në AShK, për t’iu zgjidhur rastet pronësore, dhe duke i pajisur me dokumente false, vihet në pranga 58-vjeçarja dhe në hetim bashkëpunëtorja e saj.
Sekuestrohen një shumë eurosh e dyshuar e përfituar nga kjo veprimtari kriminale, disa certifikata të dyshuara të falsifikuara dhe 2 celularë.
Si rezultat i administrimit të shpejtë të informacionit të gazetarëve të emisionit investigativ “STOP”, se ishin kontaktuar nga shtetas të ndryshëm të pajisur me dokumente false nga një shtetase, e cila i kishte mashtruar se mund t’iu zgjidhte çeshtjet pronësore, pasi kishte të njohur në Agjencinë Shtetërore të Kadastrës, specialistët e Seksionit për Hetimin e Krimeve Ekonomiko-Financiare, në kuadër të operacionit të koduar “Premtimi”, ndaluan dhe vunë në pranga të dyshuarën, shtetasen S. D., 58 vjeçe.
Gjithashtu, referuan materialet në Prokurori, ku nisi procedimi në gjendje të lirë për bashkëpunëtoren e dyshuar të 58-vjeçares, shtetasen S. N., 27 vjeçe.
Këto shtetase dyshohet se nëpërmjet veprimtarive kriminale të mashtrimit dhe falsifikimit të dokumenteve, kanë përfituar mbi 100 000 euro, nga qytetarë të ndryshëm.
Në drejtimin e Prokurorisë, vijon hetimi për të zbardhur dhe dokumentuar raste të tjera të kësaj veprimtarie kriminale, të kryera nga shtetasja S. D. dhe bashkëpunëtorja e saj.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprat penale “Mashtrimi”, “Falsifikimi i dokumenteve” dhe “Përvetësimi i titullit apo detyrës shtetërore”.
Discussion about this post