Policia e Shtetit ka nisur një hetim penal për një skemë të dyshuar mashtrimi online të quajtur “TXEX”, e cila funksionon si një formë investimesh piramidale përmes platformave digjitale.
Autoritetet paralajmërojnë qytetarët të shmangin përfshirjen në platforma që premtojnë fitime të menjëhershme dhe të paverifikuara. Ata ftojnë çdo person që ka informacion relevant të kontaktojë menjëherë strukturat përkatëse të Policisë së Shtetit.
Policia bën me dije se qytetarët duhet të tregojnë kujdes, të mos aplikojnë dhe mos përfshihen në platforma që premtojnë fitime të menjëhershme dhe të paverifikuara.
Për mashtrimin e qytetarëve shqiptarë nga skema piramidale në internet ka reaguar edhe Autoriteti Kombëtar për Sigurinë Kibernetike.
“Kjo platformë, e prezantuar si aplikacion për investime në kriptovaluta, nuk është e regjistruar dhe nuk është e licencuar në Republikën e Shqipërisë dhe si e tillë operon jashtë çdo kuadri ligjor kombëtar. Nga vëzhgimet tona dhe nga denoncimet e shumta të bëra publike, konstatohet se aktiviteti i saj mbart tiparet e qarta të një skeme mashtruese digjitale.”
Qindra qytetarë shqiptarë po bien pre skemave të reja piramidale, ku u propozohet të blejnë kriptomonedha që nuk ekziston ose u kërkohet që të investojnë para me pretendimin se brenda 45 ditësh ato do të marrin 2-fishin e parave të hedhura. Dhe TXEX nuk është platforma e vetme që po zhvat shqiptarët.
“Përveç TXEX janë dhe 2 platforma të tjera të ngjashme XUEXA dhe Grokrexduu. AKSK ka marrë masa urgjente për bllokimin e aktivitetit të këtyre faqeve mashtruese në territorin e Republikës së Shqipërisë, duke bashkëpunuar ngushtësisht me institucionet përgjegjëse AKEP, Policinë e Shtetit dhe ofruesit e shërbimeve të internetit.”
Joshja për të fituar sa më shumë e më shpejt është “mikrob” që me sa duket, gjendet në mendjen e çdo njeriu dhe mekanizmave të funksionimit të çdo shoqërie. Por Autoriteti Kombëtar për Sigurinë Kibernetike tregon se çfarë ndodh me ata që investojnë.
“Humbje financiare të parikuperueshme, rrezik të lartë për cenimin e privatësisë dhe identitetit digjital, mundësi për keqpërdorim të mëtejshëm të të dhënave personale nga rrjete kriminale”.
Discussion about this post