Skema për të liruar të burgosurin, Apeli refuzon gjykimin e shkurtuar për ish-gjyqtaren Margjeka
Është rrëzuar sërish kërkesa për gjykim të shkurtuar për ish-gjyqtaren Mimoza Margjeka dhe 4 bashkëpunëtorët e tjerë të cilët akuzohen për korrupsion.
Në seancën e sotme, u rrëzua kërkesa e Klaudio Zhillës dhe Nejton Balit për gjykim të shkurtuar, duke bërë që procesi të vazhdoj me marrje dëshmish dhe shqyrtim provash.
Në përfundim të seancës, Margjeka tha për mediat se dosja në ngarkim të saj është bosh dhe gjatë procesit do shikohet.
Ja si ishte planifikuar skema e korrupsionit
Referuar hetimeve për zbulimin e skemës së këtij rasti korruptiv, mësohet se fillimisht është përgjuar një telefonatë mes vëllait të të paraburgosurit dhe nënës së tij Afërdita. Sipas hetimeve, nëpërmjet përgjimit të telefonatës, nëna mësohet të ketë thënë se nuk mund të mbahej në burg për trafik qeniesh njerëzore. Ndërsa vëllai i të paraburgosurit ka hyrë në skemë, duke dashur të lirojë të vëllanë. Sipas skemës, me qëllim ndryshimin e masës së sigurisë për të paraburgosurin, tek gjyqtarët e Apelit në Korçë do të duhej të paguheshin 6 mijë euro. Sipas dosjes hetimore, në një moment, e ëma Afërdita Bali diskuton me djalin se nuk di nëse kanë 6 mijë euro. Për këtë arsye, në lojë hyn edhe avokati Demiri që kontakton me një biznesmen. Ndërsa, ky i fundit gjithashtu referuar hetimeve, thotë se nuk njeh gjyqtarët, por djali i tij Klaudjo Zhilla, njeh gjyqtarë. Ndërkohë, SPAK thotë se Arben Cara merr paratë në një moment dhe më pas e takon bashkëshortja Mimoza Margjeka. Bëhet fjalë për momentin kur do të merreshin paratë. Personat e sipërpërmendur me detyrë gjyqtarë, prokurorë e funksionarë pritet të dalin para gjykatës për t’u njohur me vendimin për vitet e burgimit që do të caktohet ndaj tyre lidhur me akuzat e ngritura.
