Një 29-vjeçar shqiptar, i shpallur në kërkim për mashtrim në shkallë të gjerë, është arrestuar nga Policia Federale gjermane në Aeroportin e Frankfurtit, menjëherë pasi mbërriti me një fluturim nga Dubai.
Sipas autoriteteve gjermane, ai dyshohet se është pjesë e një organizate kriminale që ka mashtruar një numër të madh viktimash në Gjermani, duke u shkaktuar dëme financiare që arrijnë në të paktën dhjetëra milionë euro.
Nga hetimet paraprake rezulton se grupi u premtonte investitorëve fitime nga investimet në asete të ndryshme, por në realitet fondet e tyre nuk investoheshin kurrë.
Autoritetet dyshojnë se bëhet fjalë për një skemë të mirëorganizuar mashtrimi financiar.
Arrestimi u krye menjëherë pas uljes së avionit në Aeroportin e Frankfurtit.
Sipas Policisë Federale, ndaj 29-vjeçarit ishte lëshuar një urdhër arresti nga Zyra e Prokurorit Publik të Dresdenit, në bashkëpunim me autoritetet shqiptare.
Pas ndalimit, shqiptari u paraqit para një gjyqtari kompetent, ndërsa procedurat ligjore ndaj tij kanë nisur.
Sipas autoriteteve, nëse shpallet fajtor për akuzat që rëndojnë mbi të, ai rrezikon deri në 15 vjet burg.
Discussion about this post