Duke filluar nga sot, do të përgjysmohet numri i autobusëve urbanë në Tirane. Në një njoftim të bërë nga Unioni i Transportit Publik, bëhet me dije se mosmarrja e asnjë mase nga ana e qeverisë, por edhe rritja e çmimit të naftës, janë shkaqet kryesore të cilat i detyrojnë ata të përgjysmojnë numrin e autobusëve urbanë në qytet. Në njoftim bëhet me dije se nuk është marrë asnjë masë nga ana e institucioneve përgjegjëse për plotësimin e kërkesave ekonomike të premtuara. Rritja e çmimeve në vendin tonë, ka pasur ndikim të drejtpërdrejtë edhe tek sektori i transportit publik, kjo për shkak të naftës e cila ka pësuar një rritje të madhe të çmimit, gjë që bëhet e papërballueshme.
Ndër të tjera, në njoftim bëhet me dije, se po shkohet drejt një kapitullimi ekonomik, për arsyen e vetme se janë lënë në harresë nga institucionet, të cilat nuk kanë bërë asnjë reagim deri më tani.
Tashmë kur ka nisur dhe viti i ri akademik, përgjysmimi i autobusëve urbanë, do të shkaktonte një kaos të vërtetë. Autobusi është mjeti kryesor i transportit i domosdoshëm për studentët në Tiranë, por tashmë situata pritet të rëndohet nga ky vendim i ndërmarrë nga unioni. Madje, pakënaqësi ka pasur gjatë gjithë kohës, kjo për shkak të numrit të madh të udhëtarëve nëpër autobusë. Pavarësisht pandemisë, rregullat nuk janë zbatuar aspak në mjetet e transportit, kjo edhe nga numri i lartë i udhëtarëve. Pra, pakënaqësia e revolta, pritet të shtohen sërish për kushtet e transportit publik ,ku tashmë është i detyruar të udhëtojë me dyfishin e qytetarëve.
Rritja e naftës ka shkaktuar krizën e parë në vend, duke pezulluar pjesërisht transportin urban në kryeqytet. Kujtojmë këtu që çmimet janë rritur për shkak të krizës, por duket se marrja e këtij vendimi ka filluar të shkaktojë dhe pakënaqësitë e kundërshtimet e para. Kriza në vend pritet të prekë edhe fushat e tjera krahas ekonomisë, ku drejtpërdrejt me të lidhet transporti urban, e më pas për të vijuar në fusha të tjera.
