Skenarët e opozitës për bllokimin e Kuvendit, Nallbati: S’do lejojmë shuarjen e…

Bledjon Nallbati, një prej deputetëve demokratë që përfshihet në atë që njihet si grupimi Berisha-Bardhi dhe që protestoi sot në sallën e Kuvendit, duke bllokuar seancën parlamentare, akuzoi mazhorancën e Kryeministrit Edi Rama se nuk lejon në Parlament opozitarizmin.

Për “Neës Line” në Abcnews, Nallbati theksoi se ata si deputetë do të bëjnë gjithçka për të mbrojtur të drejtën e opozitës që ia jep vetëm Kushtetuta.

Sakaq, ai ka theksuar se ne nuk do ta lejojmë të asgjësohet opozitarizmi dhe patjetër që ne do të reagojmë në të gjitha format për ta mbrojtur.

“Së pari, ne ishim aty siç e kishim paralajmëruar. Për sa kohë kjo mazhorancë do të vazhdojë me këtë mëndësi që të shuajë opozitarizmin në parlamentin e Shqipërisë, ne do të bëjmë gjithçka për ta mbrojtur të drejtën e opozitës, ato të drejta që jep kushtetuta dhe nuk ka të drejtë askush, as mazhoranca dhe as Edi Rama që t’i jap.

Mbas largimit të deputetëve të mazhorancës, ne kemi qëndruar aty për të diskutuar problemet tona, për atë se çfarë do të bëjmë ne në të ardhmen në seancat e radhës, duke pasur parasysh dhe vendimet që mori mazhoranca me sekretariatin e famshëm të etikës, ku përjashtojë 23 deputetë të opozitës.

Ky është një element për të treguar që në këtë sallë Parlamenti nuk ka më opozitarizëm, domethënë mazhoranca nuk do të lejojë opozitarizmin.

Ndërkohë që ne nuk do ta lejojmë të asgjësohet opozitarizmi dhe patjetër që ne do të reagojmë në të gjitha format për ta mbrojtur. Kjo është një nga format.

Nuk ka thënë kush se do të vrasë veten në parlament. Ne kemi diskutuar shpesh në mbledhjet që kemi bërë me njëri-tjetrin dhe patjetër kemi rënë dakord dhe kemi marrë vendimin që jemi ne deputetët që do ta bëjmë sakrificën në parlament në emër të qytetarëve që na kanë votuar, në emër të opozitarizmit, në emër të pluralizmit në këët vend.

Pastaj, ne pasi të bëjmë sakrificat tona, ne kërkojmë mbështetjen e njerëzve tanë në bazë, e demokratëve, e anëtarëve të PD-së. Fillimisht, jemi ne ata që do duhet ta bëjmë. Ne kemi marrë vendim që ta bëjmë betejën me këtë qeveri”, tha Nallbati.