Atëherë kur më pak pritej, pas një largimi të bujshëm në 2019 kur sapo ishte shpallur kampion, Skënder Gega u emërua trajner i Partizanit, që po kalon një situatë të vështirë në kampionat.
“Jam i emocionuar sepse vetë lidhja ime me historinë, apo identiteti im si sportist është Partizani,”-shprehet fillimisht Skënder Gega.
“Gjithmonë ka befasi në futboll. Janë 90 minuta por ka edhe shtesë tani. Një gol mund të rrëzojë një projekt dhe një gol tjetër mund të nxjerrë kampion (qesh). Unë ashier si kam shkëputur marrëdhëniet e mira me presidentin Demi apo pjestarë të tjerë të klubit. Jam i lidhur me njerëz që e duan Partizanin me shpirt. Në momentin kur presidenti e ka pa të nevojshme ndihmën timë unë s’kam refuzuar,”– vijoi ai.
Të dielën Partizani do të presë Laçin që ka hyrë në ujërat e mbijetesës, me qëllimin për të mbrojtur vendin e 4 dhe mbi të gjitha për t’u rikthyer te fitoret që shumë i mungojnë.
“Ka qenë një natë shumë e gjatë, për emocionet dhe duke menduar se çfarë mund të bëj në ndeshjen nesër. Nuk besoj se ka hapësirë për gjëra radikale, por do mundohem të jap pjesën time në mënyrën se si unë punoj dhe uroj e shpresoj që të më kuptojnë sa më shumë si lojtarët ashtu edhe pjesa tjetër e stafit”,– tha Skënder Gega.
Ashtu si Partizani-Laçi të dielën në orën 17:00 luhet në Korçë edhe Skënderbeu-Dinamo, ndërsa në orën 20:00 Vllaznia pret Teutën. Java e 32 e Superligës mbyllet të hënën me Bylis-Egnatia dhe Tirana-Elbasani.
Discussion about this post