Skënderbeu ndryshon planin për startin e përgatitjeve në sezonin e ri. Shtyrja e kampionatit për më 11 shtator dhe jo 20 gusht siç ishte planifikuar më parë, duket se ka ndryshuar edhe ditën kur korçarët do të nisin fazën përgatitore.
Fillimisht drejtuesit kishin menduar datën 5 korrik për të zbritur ekipi në fushë, por vendimi i fundit i Federatës Shqiptare të Futbollit për nisjen e sezonit të ri në 11 shtator, bëri që gjithçka të ndryshonte. Në klub po mendojnë që skuadra të nisë grumbullimin pas datës 15 korrik.
FAZA – Ndryshe nga fazat e kaluara, kur Skënderbeu shtegtonte jashtë vendit apo grumbullohej në Durrës, këtë herë është menduar që faza përgatitore të zhvillohet në Korçë.
Një gjë e tillë konfirmohet nga vetë presidenti Ardjan Takaj. “Duke parkushtet e mira që ka në zonën sportive të qytetit, por edhe faktin se shumë klube kanë zgjedhur Pogradecin për të zhvilluar përgatitjet dhe është edhe mundësia për të zhvilluar takime miqësore, do të bëjmë fazën në Korçë.
Terrenet sportive janë perfekte, edhe klima po ashtu. Plus kësaj edhe fakti që shumë klube janë në grumbullim në juglindje mund të na shërbejnë për testet miqësore që do të caktojmë”, theksoi presideneti. Në kushte të tilla bardhekuqtë pritet që të nisin nga strofulla e tyre përgatitjen.
Memelli tashmë ka komunikuar të gjithë grupin aktual për shtyrjen në kohë të fazës dhe të gjithë pritet që të jenë prezent në ditën e caktuat nga klubi. Ndërkohë, sa i përket merkatos në hyrje, deri më tani janë konfirmuar nga drejtuesit afrimet e portierit Shkëlzen Ruçi, mesfushorit Jurgen Vrapi si dhe brazilianit Murilo Rosa.
Nga ana tjetër, të larguar konsiderohen emra si Fallou Nxhie, Aleksandros Rahim, Shqiprim Taipi, Mërgim Shala, Ditmar Bicaj, Mario Dajsinani dhe Arinaldo Rrapaj. Dilema të mëdha ka për Uerdi Marën.
