Java e katërt e Superiores nis sot me një përballje interesante mes Skënderbeut dhe Tiranës. Takimi do të luhet në stadiumin “Skënderbeu”, duke nisur nga ora 18:30, ndërsa korçarët do të kenë për herë të parë këtë sezon mbështetjen e tifozëve në shtëpi.
Skënderbeu nuk e ka nisur në mënyrën më të mirë kampionatin, pasi në tri javët e para ka grumbulluar vetëm një pikë. Megjithatë, kalendari ka qenë i vështirë për skuadrën e drejtuar nga Ahmataj, e cila është përballur me Vllazninë, Dinamon dhe Egnatian.
Pas ndeshjeve të para të zhvilluara jashtë Korçës për shkak të punimeve në stadium, sot skuadra juglindore rikthehet në shtëpi. Tifozët pritet të jenë të shumtë në shkallët e stadiumit dhe Skënderbeu shpreson që atmosfera të jetë një faktor i rëndësishëm për të kërkuar fitoren e parë të sezonit.
Në krahun tjetër, Tirana mbërrin me më shumë besim pas suksesit të thellë ndaj Vorës. Trajneri Klafuriç e ka bërë të qartë se bardheblutë synojnë tri pikët në Korçë, pasi objektivi i klubit është sigurimi i një vendi në kupat e Europës.
Të dyja skuadrat kanë nevojë për pikët e plota, ndaj pritet një duel i luftuar që në minutat e para.
Discussion about this post