Në orët e para të natës së kaluar tre të burgosur janë arratisur nga burgu i Avellino-s, në Itali. Njëri prej tyre, 45 vjeç me origjinë shqiptare, u kap nga policët, teksa tentonte të arratisej nga burgu.
Kërkimet e dy të tjerëve janë ende në vazhdim, ku bëhet fjalë për një maroken 40-vjeçar dhe një rumun 22-vjeçar. Sipas hetimeve, tre të burgosurit kanë bërë një vrimë në murin e qelisë dhe prej andej janë ulur me çarçafë.
“Dy prej tyre do të kishin përdorur të njëjtat çarçafë për të ngjitur murin rrethues, ndërsa tjetri, një burrë me kombësi shqiptare, i cili do të bllokohej nga policia e burgut, që ndërhyri pas alarmit të shkaktuar nga dhoma e operacionit që kishte kuptuar se çfarë ishte. Një i burgosur i katërt do të qëndronte në qeli, duke hequr dorë nga arratisja në momentin e fundit”.
Këtë e bën të ditur Gennarino De Fazio, Sekretar i Përgjithshëm i Policisë së Burgjeve Uilpa, i cili shton: “Ashtu siç pritej dhe raportohej gjerësisht, spiralja e ngjarjeve negative, në çdo aspekt, ndikon në sistemin e burgjeve dhe në fund të fundit, sigurinë e vendit. Avellino, për më tepër, është një déjà vu, me të njëjtën dinamikë, pasi ka pasur një tjetër arratisje disa vite më parë. Duhet miratuar menjëherë një dekret burgu për të trajtuar urgjencën e stafit të policisë së burgjeve, të cilave u mungojnë 18 mijë njësi”, shtoi ai.
Discussion about this post