Skënder Gega është trajneri më i dashur për tifozët e Partizanit, pasi është i vetmi trajner që ka arritur të nxjerrë demat kampion në shekullin XXI-të.
Në një intervistë për “Panorama Sport”, ish-tekniku i kuq ka analizuar skuadrën e Partizanit se si duket këtë sezon pasi udhëheqin kampionatin shqiptarë.
Gega ka theksuar gjithashtu se skuadra që drejtonte kur ishte te demat ishte e gjitha me “burra’, ndërsa nuk nguron të theksojë se futbolli ka shumë brishtësi.
Si ju duket Partizani, është në gjurmët e atij tuajit para tri vitesh? Unë nuk preferoj të bëj paralelizma, ka qenë një vit me histori komplet tjetër, në një situatë tjetër, në një ambient komplet tjetër. Aq më tepër për mua që isha për herë të parë si trajner i Partizanit. Ishte sezon i mrekullueshëm, kështu që ngelet ashtu. Kurse në këtë vit, me aq sa kam pasur mundësi ta ndjek për shkak të angazhimeve të mia, kanë bërë nisje të mirë dhe e meritojnë të jenë të parët.
Shihni ndonjë element të ngjashëm të kësaj skuadre me tuajën, pasi emrat kanë ndryshuar thuajse totalisht? Po, patjetër, kështu është jeta, gjërat ndryshojnë dhe evoluojnë. Dikur me ndryshime bëhet progres, ndonjëherë ngelesh në vend apo bën regres. Emrat janë të përveçëm. Unë personalisht mendoj se ai grup lojtarësh ishin burra për mua. Të gjithë kishin karaktere burrërore. Futbolli patjetër që ka brishtësi, zbehje e luhatje, sepse luajmë me kundërshtarë të niveleve të ndryshme. Unë e kam kaluar me qetësi. E rimerrnin veten pas ndonjë goditjeje, kishin harmoni, çdo gjë ishte e hapur dhe dashamirëse mes meje dhe ekipit apo mes meje kundrejt klubit. Nëse nuk funksionon kjo nuk do të jesh asnjëherë i suksesshëm. Edhe unë mora pjesën time të suksesit, e kisha ëndërr të dilja kampion me atë fanellë, sepse jam rritur atje. Këtë vit ka gjëra pozitive, të cilat i kam dalluar. Kanë luhatjet e veta, në futboll luhet për pikë dhe ai që e ka biznes në fund sheh pikët dhe investimin, por teknikisht asnjë ekip nuk është perfekt. Përtej luhatjeve kanë bërë ndeshje të mira. Duhet mentalitet i fortë i ekipit dhe lojtarë të aftë të ngrihen emocionalisht qoftë pas derbit, qoftë në ndeshjet e tjera. Vetëm ato të nxjerrin kampion.
Ju nuk humbët asnjë derbi nën drejtimin e Partizanit, por ndryshe po ndodh me skuadrën aktuale. Çfarë mendoni se i duhet kësaj skuadre për të dalë me sukses në derbi? Kam dëgjuar dhe kam lexuar njerëz që prononcohen vazhdimisht për derbet dhe ndonjëherë kur janë emocionale edhe ndoshta gabojnë, sepse historikisht derbet nuk kanë pasur diferenca. Cinizmi, loja me kujdes dhe ekuilibrat e bëjnë një derbi jospektakolar, por gabimet të jenë të limituara. Unë besoj se në gjithë këto derbe që Partizani nuk ka triumfuar, ka qenë për shkak të mungesës së ekuilibrit. Kurse ai Partizan, që vazhdimisht cilësohej si cinik, por jo spektakolar, garancinë e kishte, sepse kishte ekuilibra dhe ishte i ndërgjegjshëm se 90-minutëshi luhet deri në sekondën e fundit. Në atë vit kemi fituar tri derbe dhe kemi barazuar një. Ka qenë shumë e veçantë, sepse kemi ngritur Kupën pas 26 viteve po në fushën e Tiranës.
Discussion about this post