Sllovakia nuk do të mbështesë një paketë të re sanksionesh të BE-së ndaj Rusisë derisa të marrë garanci për furnizimin e saj me energji, theksoi kryeministri Robert Fico.
Fico i bëri thirrje Komisionit Evropian të rishqyrtojë objektivat e saj klimatike për të marrë parasysh nevojat energjetike të Sllovakisë, pa specifikuar se si duhet të bëhet kjo.
“Unë nuk do të mbështes një paketë tjetër sanksionesh derisa Komisioni Evropian të paraqesë propozime realiste se si të pajtohen objektivat ambicioze klimatike me nevojat e industrisë automobilistike, jo vetëm në Sllovaki, por në të gjithë Evropën”, theksoi ai.
Komentet erdhën pas një takimi me presidentin e Këshillit të BE-së, Antonio Costa, në Bratislavë.
Sllovakia mbetet shumë e varur nga gazi dhe nafta ruse edhe tre vjet pas pushtimit të plotë në Ukrainë nga Rusia.
Prodhimi i saj industrial dominohet nga sektorë me intensitet të lartë energjie, siç është industria automobilistike dhe e rëndë.
Qeveria sllovake fillimisht kishte bllokuar paketën e 18-të të sanksioneve të BE-së në korrik për të siguruar garanci energjie, megjithëse më vonë hoqi dorë nga kundërshtimi i saj pavarësisht se mori vetëm angazhime të paqarta nga Brukseli.
Discussion about this post