Pas daljes në shitje të Alpha Bank – Shqipëri, kanë nisur të shfaqen subjektet e para të interesuara për blerjen e saj.
Burime nga tregu bëjnë të ditur se një nga subjektet që ka shfaqur interes është banka sllovene Nova Ljubjanska Banka (NLB Banka).
Banka NLB është ish-bankë me kapital 100% shtetëror slloven dhe që prej vitit 2018 e listuar në Bursën e Londrës. 75% e aksioneve janë të listuara në Bursë, ndërsa qeveria sllovene mbetet aksioneri më i madh, me 25% të aksioneve.
NLB është e pranishme prej vitesh në të gjitha tregjet e tjera të Ballkanit Perëndimor, përfshi Serbinë, Malin e ZI, Maqedoninë e Veriut, Bosnje-Hercegovinë dhe Kosovë. Hyrja në Shqipëri do të finalizonte shtrirjen e grupit slloven në të gjitha tregjet e Ballkanit Perëndimor.
Vitin e kaluar NLB hodhi një hap tjetër drejt zgjerimit rajonal, pasi privatizoi 83% të aksioneve të bankës serbe Komercijalna Banka për rreth 395 milionë euro, duke u bërë grupi i tretë më i madh bankar në Serbi. NLB është gjithashtu banka e tretë më e madhe në tregun fqinj të Kosovës. Në fund të vitit 2020, Banka NLB Kosovë zotëronte asete totale në vlerën e 879 milionë eurove, ose rreth 16.4% të tregut bankar të Kosovës, duke u renditur e treta për nga madhësia, pas Raiffeisen dhe ProCredit.
Drejtori i përgjithshëm i bankës sllovene, Blaz Brodnjak u shpreh në muajin maj për agjencinë serbe Tanjug se NLB po e vlerëson mundësinë e hyrjes edhe në tregun shqiptar, për t’u bërë banka e parë e pranishme në të gjashtë vendet e Ballkanit Perëndimor.
Banka NLB nuk ka marrë pjesë zyrtarisht në proceset e mëparshme të shitjes së bankave tregtare në Shqipëri, në periudhën 2015-2019. Në këto procese palët kryesore kanë qenë kryesisht investitorë lokalë ose hyrësit e rinj në treg. Pas shpërthimit të krizës financiare të vitit, interesi i grupeve bankare nga Bashkimi Europian dhe Eurozona për tregun shqiptar dhe atë rajonal në tërësi ka qenë në rënie. Keqësimi i performancës financiare dhe kostot rregullatore në rritje bënë që shumë prej tyre, si Credit Agricole, Societe Generale, Grupi i Pireut apo NBG Bank të shisnin bankat e tyre në Shqipëri dhe në vende të tjera të rajonit. Pas hungarezëve të OTP, NLB është i pari grup bankar nga vendet e BE-së që po shfaqet i interesuar për të hyrë në tregun shqiptar në dekadën e fundit.
Burime nga bankat pohuan se edhe nga tregu i brendshëm ka një interes të lartë për blerjen e Alpha Bank. Disa banka në vend po e shqyrtojnë këtë mundësi, mes tyre edhe banka lokale dhe disa nga më të mëdhatë.
Interes së fundmi për Ballkanin kanë shfaqur dhe bankat turke. Në Kosovë dhe Maqedoninë e Veriut janë të pranishme disa banka me kapital turk. Së fundmi, Ziirat Bank po hap filial në Kosovë.
Alpha Bank Albania zotëron një pjesë tregu të konsiderueshme, prej 4.9% të aseteve totale të sektorit bankar shqiptar. Një përmasë e tillë e bën objektiv me interes për bankat që duan të rrisin pjesën e tyre të tregut përmes blerjeve.
