Reali i Madridit, po i gëzohet rezultateve pozitive, të ndeshjeve të para të sezonit, sidomos pas fitores ndaj Celta de Vigos në stadiumin Abanca-Balaídos, me gol të shënuar nga blerja më e fundit e Realit, Jude Bellingham.
Carlo Ancelotti ka vënë bast te të njëjtët futbollistë që zbritën në fushë ndaj Almerias, duke zëvendësuar vetëm portierin Lunin me Kepa Arrizabalagan.
Kjo gjë e ka dëmtuar dukshëm Luka Modric, i cili deri sezonin e kaluar ishte titullar i padiskutueshëm, por tashmë trajneri italian vendosi ta lërë në stol së bashku me Toni Kroos.
Situata aktuale e futbollistit nga Zadari mund të bëjë të lumtur antimadridistët, por shihet me kureshtje edhe nga klubet saudite, ku ende po punojnë për të marrë shërbimet e kroatit këtë verë.
“Luka ka zgjedhur tashmë atë që dëshiron të bëjë vitin e ardhshëm. Është një situatë e pazakontë për të, ai nuk është i lumtur, por po bën shumë mirë. Ai do të kontribuojë. Për të gjithë është një situatë e veçantë”, tha Ancelotti në një konferencë për shtyp duke hedhur poshtë çdo hipotezë lamtumire të legjendës merengue.
Megjithatë, nga futbolli arab po lëvizin 200 milionë euro që mund të destabilizojnë qartë Real Madridin.
Në orët e fundit, ‘OK Diario’ ka siguruar që Luka Modric ka marrë sërish thirrje nga disa klube që duan ta largojnë atë nga Europa dhe t’i ofrojnë një pension të artë.
Kroati për momentin është pas Fede Valverde, Aurélien Tchouaméni, Jude Bellingham apo Eduardo Camavinga, në një situatë të pazakontë për të. Në orët në vijim, pritet të shihet se si do të përfundojë.
Discussion about this post