Lali Eri ka vendosur t’ua nxijë jetën shoferëve në Tiranë, kur parkojnë në vende të ndaluara. Këtë do ta bëjë me bllokues rrote, numri i të cilëve do të shumëfishohet. Trafiku dhe mungesa e vendeve të parkimit është tmerri me të cilin përballën çdo ditë qytetarët, por nuk kanë parë gjë akoma! Vende parkimi nuk ka, por edhe nëse gjen ndonjë hapësirë pagesat janë shumë të shtrenjta, qoftë tek parkimet private, qoftë tek ato publike (Tirana Parking).
Por, përveç kësaj ndodh që në disa institucione nuk ka fare vend për parkim dhe qytetarët që kanë ndonjë shërbim për të marrë i lënë makinat në anë të rrugës. Në këtë rast Policia Rrugore, por më së shumti Policia Bashkiake, turren t’u vënë gjoba. Ka edhe plot raste kur gjobat vihen në mënyrë abuzive.
Me paratë e mbledhura nga policët, Veliaj do të blejë shumë “bllokues rrote”.
Më datë 1 dhjetor 2023, Bashkia Tiranë ka firmosur tenderin me objekt “Blerje bllokues rrote për Policinë Bashkiake”, me fond limit 15 milionë lekë. Fituese është firma GENERAL PLUS” SHPK, në pronësi të Fatos Brajës.
Në dokumentet e tenderit thuhet se bllokuesit duhet të jenë të përbërë me material çelik karboni dhe preferohen me përmasa jo më shumë se 600 mm*300 mm, me kusht që të vendosen në gjerësinë e gomave me diametër nga R13 deri në R17.
Po ashtu, këto pajisje duhet të kenë, sipas Autoritetit Kontraktor, diametër të rrotës të rregullueshëm, të përshtatshëm për çdo automjet dhe më e rëndësishmja, të mos mund hiqen nga drejtuesit e mjeteve të cilët ndëshkohen me gjobë dhe këtë masë shtesë.
“Bllokuesit i nevojiten Policisë Bashkiake në realizimin sa më efikas të detyrave të saj funksionale konkretisht për bllokimin e mjeteve në rast të ndodhjes së tyre në kundravajtje apo në kundërshtim me legjislacionin në fuqi”, thuhet në argumentimin e kësaj procedure prokurimi.
Siç shihet në tabelë, Lali Eri do të blejë 100 copë “bllokues rrote”. Në fakt, Policia Bashkiake ka plot bllokues që ka blerë herë pas here, prandaj nuk kuptohet pse duhen kaq shumë?
Pak më lart ne përmendën se shpesh herë Policia e Tiranës vendos gjoba pa kriter, shpesh për vepra që shoferët në Tiranë nuk i kanë kryer fare. Me e shpeshta, aktualisht ndodh që vendosen gjoba për vendparkime të gabuara, edhe pse automjeti nuk ka qenë fare aty. Apo gjoba kalohet në sistem një ditë më vonë që qytetari të mos përfitojë nga orari 24 orësh për të paguar vetëm gjysmën e vlerës së saj.
Ndërkohë sistemi Tirana Parking shpesh nuk punon fare. Dhe Policia Bashkiake thyen shpesh rekorde për vendosjen e gjobave ndaj automjeteve. Madje këtë vit, ashtu sikur ndodh çdo herë, festat e nëntorit nuk kanë kaluar në qetësi apo si ditë feste për dhjetëra qytetarë, kjo për shkak se Policia Bashkiake i ka mbytur në gjoba.
Ditën e hënë, të martë dhe të mërkurë, pra të tre ditët pushim, dhjetëra e qindra qytetarë kur kanë dalë nga shtëpitë e tyre e kanë gjetur mjetin me një gjobë të vendosur në xham. Shumë prej tyre kanë patur debate dhe përplasje me punonjësit e Tirana Parking, por edhe me policët bashkiakë. Vetëm gjatë asaj jave vendosur 10 mijë gjoba nga Policia Bashkiake Tiranë.
Qytetarët kanë kundërshtuar gjobat me argumentin se janë ditë pushimi zyrtare, por policët bashkiakë janë justifikuar me argumentin se nuk ka ndonjë urdhër të tillë, për ta pushim janë vetëm e shtuna dhe e diela.
E hëna e shpallur nga qeveria dhe e marta dhe e mërkura që janë festat zyrtare të nëntorit, nuk njihen prej tyre. Dhjetëra denoncime të qytetarëve tregojnë sesi në zonën e ish-Bllokut, rrugën Myslim Shyri, apo edhe në zona të tjera ku parashikohet parkimi me pagesë, janë gjobitur nga policia, duke u prishur edhe ditët e festave.
Nuk mjaftojnë taksat e larta, trafiku dhe zhurma, por shumë banorë të kryeqytetit duhet të paguajnë edhe gjobat e majme të bashkisë në ditët e pushimit zyrtar. Blerja e 100 copëve bllokues rrote është një tjetër masë terrorizuese ndaj qytetarëve!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post