Pas tre orësh debate dhe pa asnjë vendimmarrje lidhur me pikat e rendit të ditës, deputetët e Partia Socialiste u larguan nga mbledhja e Komisionit Hetimor të Shëndetësisë.
Kryetarja Albana Vokshi tha se kjo është një përpjekje e PS për të bllokuar punën, pasi nuk pranon të miratojë kërkesat për informacion.
Mbledhjen e radhës, Vokshi e caktoi të premten.
“Po kërkojnë të mbulojnë korrupsionin dhe abuzimin kriminal të dy koncesioneve. E paimagjinueshme kjo që po ndodh në këtë komision. 8 deputetë e mazhorancës janë vënë në mbrojtje të këtij korrupsioni. Refuzojnë të dërgojnë kërkesat për informacion. Meqë deputetët e PS përsëri bojkotuan komisionin, u larguan për të penguar hetimin parlamentar, po thërras mbledhjen e radhës ditën e martë. Orarin do e caktojmë, rendi i ditës vijon të jetë miratimi i kërkesave për informacion dhe diskutim i planeve”, tha Vokshi.
Mbledhja u shoqërua me debate mes deputetëve të mazhorancës dhe atyre të opozitës. PS kërkoi miratimin e planit të hetimit, ndërsa opozita u shpreh se fillimisht duhet të miratohen kërkesat për informacion.
Plani hetimor i opozitës parashikon që në listën e dëshmitarëve të thirret kryeministri Edi Rama, ish-ministrat e Shëndetësisë, Beqaj e Manastirliu, ministrja Koçiu, etj. Ndërsa nga mazhoranca kërkohet shtrirja e listës së dëshmitarëve me të gjithë ish-ministrat e Shëndetësisë që nga viti 2006. Planin e mazhorancës, kryetarja Albana Vokshi e cilësoi “planin e (Ilir) Beqajt”. Gjatë mbledhjes, ajo hodhi akuza ndaj deputetëve të mazhorancës se “po paguhen nga paratë e përfituara nga sterilizimet që të pengojnë punën në komision”. Nga ana tjetër, deputeti socialist Petro Koçi akuzoi opozitën se “po i bën shantazh kompanive për t’iu vënë gjoba.”
Discussion about this post