Komisioni për Çështjet Ligjore, ka miratuar me 15 vota pro propozimin e deputetes së PS, Ermonela Felaj për ligjin për komisionet hetimore.
Ndërsa u hodhën poshtë propozimet e bëra nga deputetët Jorida Tabaku dhe Edmond Spaho.
Felaj tha se propozimi i PS bazohet në ligjin gjerman për komisionet hetimore. Sipas këtij projektligji, komisionet hetimore do të ngrihen vetëm për çështje të veçanta dhe jo mbi aludime. Gjithashtu komisionet hetimore mund të zhvillohen edhe me dyer të mbyllura në raste të caktuara me qëllim mbrojtjen e të dhënave të dëshmitarit që mund të merret në pyetje.
Projektligji u depozitua nga deputetja socialiste, Ermonela Felaj, në një kohë kur mazhoranca nuk pranon ngritjen e 8 komisioneve hetimore parlamentare të kërkuara nga opozita.
Deputetja e PD-së Jorida Tabaku në një deklaratë për mediat foli pikërisht për këtë ndryshim, ku akuzoi mazhorancën se po përdor ligjin për favor dhe kontroll.
Shtesat dhe ndryshimet në funksionimin e ligjit për Komisionet Hetimore, parashikojnë që të kufizojnë të drejtat e opozitës për ngritjen, objektin dhe mënyrën e zhvillimit të komisioneve hetimore parlamentare.
“Sot mazhoranca ndryshoi ligjin duke e kthyer atë në një instrument në favor dhe kontroll. Ky ligj ka shkaktuar probleme për mazhorancën. PD arriti të vendosë para drejtësisë dhe ish-ministra. Treguan që nuk janë të gatshëm që të ndryshojmë ligjin për t’i dhënë hapësirë parlamentit, por për ta bërë atë si instrument ashtu siç do PS-ja”, u shpreh Tabaku.
Discussion about this post