Sekretariati për Procedurat, Votimet dhe Etikën shqyrtoi sot kërkesën e Grupit Parlamentar të Partisë Demokratike për “marrje mase disiplinore ndaj ministres për Marrëdhëniet me Parlamentin, Elisa Spiropali”.
Grupi Parlamentar i PD pretendon se kanë konstatuar sjellje joparlamentare nga deputetja Spiropali. Kjo kërkesë u bë pasi në seancën plenare të fundit Spiropali me nota ironike u shpreh se duhet të mbahet një minutë heshtje për Edmond Spahon, pasi sipas saj ka qëndruar heroikisht në Kuvend, duke bllokuar foltoren dhe duke i fryrë bilbilit.
Pas shqyrtimit, Sekretariati vendosi me shumicë votash rrëzimin e kërkesës së Grupit Parlamentar të Partisë Demokratike.
Gjithashtu, Sekretariati shqyrtoi edhe kërkesën e deputetit Gazment Bardhi, i cili kërkoi anulimin e votimeve të kryera në seancën plenare të datës 23.02.2023.
Kjo kërkesë, sipas Bardhit, u bë pasi në seancën e fundit plenare vendimet e votuara në Kuvend nuk kishin numrin e duhur të kartonëve.
Sekretariati vendosi me shumicë votash rrëzimin e kërkesës së Gazment Bardhi duke e konsideruar të vlefshëm votimin në seancën plenare të datës 23.02.2023.
Discussion about this post