Soft News/ 50+30 = 62! Rama imiton Lulzim Bashën në reagimin para ndeshjes me Italinë

Kryeministri Edi Rama vjen në stilin “alla Lulzim Basha” në vigjilje të takimit të parë për Shqipërinë, në Euroianin që zhvillohet në Gjermani.

Rama, i cili nuk lë sebep pa u mburrur, ka gjetur suksesin e Kombëtares që siguroi pjesëmarrjen në Euro 2024, për të mbushur “FB”-në me materiale.

Kryeministri, i cili njihet si i fiksuar pas rrjeteve sociale (sipas dëshmive të ish anëtarëve të kabinetit qeveritar), ka përcjellë informacionin që mediat kanë raportuar ditët e fundit: 50 mijë shqiptarë priten të jenë prezentë në stadiumin e Dortmundit në ndeshjen e parë të Shqipërisë në këtë turne, përballë Italisë.

Megjithatë, llogaritja që bën për numrin e tifozëve ngjan me atë të ish-kryedemokratit Lulzim Basha, kur artikulonte në Kuvend se 7*7=42.

Rama thotë se përveç 50 mijë shqiptarëve, në stadium do të jenë edhe 31 mijë fansa të ekipit Kombëtar të Italisë. Por, kapaciteti i stadiumit ku Kombëtarja do të zhvillojë takimin e parë të turneut, këtë kampionat europian, nuk do të jetë 81 mijë-sa e llogarit Rama, por 62 mijë.

Referuar të dhënave në faqen zyrtare të ekipit të Dortmundit, stadiumi “Signal Iduna Park” ku luan skuadra gjermane, ka një kapacitet prej 81,365 vendesh.

Megjithatë, gjatë këtij kampionati euroipian, do të jetë i reduktuar. Ky fakt është publikuar nga UEFA që organizon turneun dhe raportimet mediatke prej kohësh tashmë. Sipas faqes zyrtare të UEFA-s, “Signal Iduna Park” do të ketë një kapacitet prej 62,000 vendesh gjatë turneut.

Kjo e dhënë gjendet lehtësisht në faqen zyrtare të UEFA-s.

Rama, ose përgjegjësi që i administron faqen, ndoshta nuk është në dijeni të faktit. Ose, hamendësimi tjetër, ka dëshirë të madhe që të shtojnë numrin e italianëve në ndeshjen kundër Shqipërisë duke shpërndarë një “fake news” (siç ka bërë në disa raste në të kaluarën).

Gjasat janë që hipoteza e parë të jetë e sakta, pasi Edi Rama vlerësohet (të paktën nga Elisa Spiropali) një kryetar shteti atdhetar dhe patriot.

Në komentet në statusin e kryeqeveritarit, krahas atyre që e mburrin Ramës për suksesin e Kombëtares (?!), ka dhe nga ata që i kujtojnë se …ja ka futur kot!

P.S. Këta të fundit me gjasë janë pjesë e atij grupit të tifozerisë që besojnë se Rama ndjell ters dhe shpresojnë që ai të shfaqet të premten në Dortmund i veshur me fanelën e Italisë.