Sopranoja e njohur shqiptare, Ermonela Jaho është pranuar si anëtare e jashtme e Akademisë së Shkencave të Shqipërisë. Lajmin e ka bërë vetë me dije ajo përmes një shënimi në rrjete sociale, teksa shprehet shumë e prekur për këtë nder të madh.
“E prekur pa masë dhe e përkulur për nderin e madh te pranimit si anëtare e jashtme e Akademisë së Shkencave të Shqipërisë. Ju faleminderit”, shkruan ajo.
Ermonela Jaho është soprano shqiptare me famë botërore. Lindi në Tiranë në vitin 1974. U largua në vitin 1993 nga Shqipëria për në Itali me një bursë studimi dhe më pas iu desh ta realizojë ëndrrën e ngjitjes në skenë, përkrah artistëve të huaj.
Pas përfundimit të studimeve për këndim dhe piano, ajo fitoi disa konkurse të rëndësishme, të tilla si: Giacomo Puçini në Milano Itali më 1997, Spontini International Ancona, Itali më 1998, në Rovereto Zandonai, Itali më 1999, këngëtarja më e mirë e Festivalin Wexford më 2000.
