Luigi Soreca ka nisur zyrtarisht detyrën, ndonëse përkohësisht, si ambasadori i BE-së në Tiranë, duke zëvendësuar gjermanen Christine Hohmann, e cila doli nga shërbimi diplomatik i Bashkimit Evropian, për t’u rikthyer si pjesë e diplomacisë së Berlinit zyrtar në Irak.
Soreca rikthehet në Shqipëri në të njëjtin funksion, ndërsa diplomati e konsideron këtë si një privilegj, nisur nga fakti që për Shqipërinë është një moment mjaft i rëndësishëm në rrugën e saj drejt familjes Europiane.
“Është një nder dhe një privilegj të jem përsëri në Tiranë në këtë moment veçanërisht të rëndësishëm për zgjerimin e BE-së dhe për procesin e integrimit të Shqipërisë në BE, dhe në të njëjtën kohë me Samitin e ardhshëm të Procesit të Berlinit në Tiranë. BE qëndron krah Shqipërisë për të konsoliduar progresin e arritur, thellimin e transformimit të vendit dhe shtyrjen për reforma të rëndësishme që do ta sjellin Shqipërinë në BE”, tha ambasadori.
Soreca ka shërbyer si ambasador në vendin tonë për tre vite e shtatë muaj. Ai erdhi në Tiranë në shtator të vitit 2018, për t’u larguar në prill të 2022.
Discussion about this post