Sot në orën 15:30 luhet java e fundit e Bundesligës dhe pasi të luhen të gjitha ndeshjet do të mësojmë nëse Bayern do ta fitojë titullin e 11-të radhazi të kampionit gjerman apo Borussia Dortmund do të festojë për herë të parë që nga viti 2012.
Borussia ka dy pikë më shumë se Bayerni dhe nëse e mposht Mainzin sot në shtëpi do ta fitojë titullin kampion.
Nga ana tjetër, Bayern viziton Këlnin dhe i duhet patjetër një fitore, duke shpresuar një barazim apo humbje nga ana e Dortmundit, për të fituar titullin e 11-të radhazi të Gjermanisë.
“Nuk mund ta lëmë këtë të ikë. Duhet të fitojmë edhe një herë. Kam një ndjenjë të mirë, por e di që duhet të luajmë shumë mirë. Vetëm atëherë do ta meritojmë titullin. Ndërsa lojtarët do të shkojnë drejt stadiumit , turma do t’i brohorasë, do t’i jap forcë”, tha drejtori sportiv i Dortmundit, Sebastian Kehl, i cili ishte kapiteni i ekipit në kampionatin e fundit të fituar.
E ndërsa skuadra nga Dortmundi në sezonet e fundit është mbështetur kryesisht në golat e Erling Haaland, këtë sezon Borussia po luan si ekip dhe ka dhënë rezultate.
Sulmuesi i Bregut të Fildishtë, Sebastien Haller, i cili u diagnostikua me kancer verën e kaluar, u soll për të zëvendësuar Haaland.
Megjithatë, Haller u kthye gjashtë muaj më vonë pas operacionit dhe kimioterapisë dhe shënoi shtatë gola në nëntë ndeshjet e fundit.
Bayern ka pas një nga sezonet më të këqija në vitet e fundit, dhe skuadra me sa duket do të fillojë rindërtimin, pavarësisht nga rezultati i sotëm i Bundesligës.
Ndeshjet:
Këln – Bayern (e shtunë, ora 15:30)
Dortmund – Mainz (e shtunë, ora 15:30)
Discussion about this post