Sot mbyllet java e 25-të e Superiores, Tirana dhe Skënderbeu luftojnë për mbijetesë

Ditën e sotme do të luhen dy sfidat e fundit të javës së 25 të Superiores. Ndeshje mjaft interesante do të luhen në aksin Laç – Elbasan.

Në orën 13:30, Laçi do të presë në shtëpi skuadrën e Teutës, me ekipet që duan pikë për t’iu larguar “zonës së ftohtë”. Ndërkohë që Bledar Devolli është ende në kërkim të triumfit të parë si trajner i durrsakëve.

Në krahun tjetër, duke nisur nga ora 16:30 në stadiumin “Elbasan Arena”, Tirana do të presë Skënderbeun.

Një ndeshje që luhet për pikë jetike për shkak se bardheblutë janë të parafundit në renditje, ndërsa korçarët të fundit.

Për bardheblutë do të jetë tepër e vështirë sepse në radhët e tyre do të ketë plot 9 mungesa të rëndësishme.

Sherri në derbi ishte ai ç’ka “masakroi” Tiranën me kartonë të kuq. Marku, Mici, Gjumsi dhe Kozi do të jenë mungesat për shkak të atyre kartonëve të kuq. Ndërsa Akileu Ndreca dhe Florjan Përgjoni kanë plotësuar numrin e kartonëve të verdhë.

Por, mungesa ka edhe prej dëmtimeve. Ismajli, Soler dhe Haxhiu janë dëmtuar para Skënderbeut, duke qenë të tjera mungesa të rëndësishme. Vlen të përmendet që edhe drejtori sportiv Agim Ibrahimi do të mungojë pasi është ndëshkuarm e 4 ndeshje nga Disiplina.

NDESHJET:

LAÇI-TEUTA 13:30

TIRANA-SKËNDERBEU 16:30 (në “Elbasan Arena”)