Ditën e sotme në Gjykatën civile të Tiranës do të shqyrtohet kërkesa e grupit të Rithemelimit të PD për ndryshimet statutore të miratuara në Kuvendin e 11 dhjetorit 2021.
Mbrëmjen e kaluar Sekretari i Përgjithshëm i Partisë Demokratike Gazment Bardhi deklaroi se gjyqtari Agron Zhukri nuk mund të marrë në shqyrtim kërkesën e grupit të Rithemelimit për regjistrimin e Statutit të 11 dhjetorit, sepse për të nuk ka dosje.
Sipas juristëve të Partisë Demokratike, gjyqtari Agron Zhukri nuk mund të shqyrtojë një kërkesë të Rithemelimit për ndryshim të statutit të PD-së, bazuar në kuvendin e 11 dhjetorit, pasi ekziston vetëm një PD dhe dosja me ndryshimet statutore është ankimuar prej tyre në Apel.
Ende nuk dihet nëse Apeli e ka marrë në shqyrtim këtë ankimim të selisë blu. Ndërkohë që në seancën e 18 Marsit kur u miratuan ndryshimet statutore të 17 korrikut, juristi Indrit Sefa tha se ende nuk e kishte dorëzuar kërkesën për 18 dhjetorin. Megjithatë, gjithçka pritet të sqarohet ditën e sotme. Pas deklaratave të Gazment Bardhit që sqaronte pikërisht pse Zhukri smund të marrë në shqyrtimin çështjen, Komisioni i Rithemelimit e akuzoi atë për kërcënime ndaj gjyqtarit, duke përbërë sipas tyre, vepër të rëndë penale.
Discussion about this post