Zvicra do të ndeshet sot me Portugalinë në Kampionatin Botëror “Katar 2022” për raundin e çerekfinaleve. Teksa të dy ekipet kërkojnë të marrin një “biletë” për fazën e mëtejshme, futbollisti Granit Xhaka ka lëshuar një paralajmërim të fortë. Shqiptari që luan me kombëtaren e Zvicrës deklaroi se nuk do të ndalet përballë ekipit të Cristiano Ronaldos.
Ai ishte i pranishëm në konferencën për shtyp në prag të sfidës që do të luhet sot në orën 20:00. Xhaka iu rikthye edhe një herë sfidës ndaj Serbisë.
“Ajo ndaj Serbisë ishte një ndeshje me shumë emocione, por nervozizmi, adrenalina dhe gëzimi janë pjesë e futbollit. Të premten zhvilluam një ndeshje të shkëlqyer, e dinim se Serbia ishte shumë e rrezikshme, por pavarësisht vështirësive, ishte një fitore e merituar. Sidoqoftë, ajo ka kaluar dhe kemi punuar shumë për sfidën e radhës”, tha Xhaka, ku më pas u ndal te përballja ndaj Portugalisë.
“Kur kemi nisur këtë aventuraë nuk kemi vendosur kufij apo objektiva. Dëshira jonë është që të avancojmë sa më shumë. Jemi të lumtur për gjithçka që kemi bërë, por nuk duam të ndalemi me kaq. Synojmë t’i krijojmë probleme Portugalisë dhe jemi të bindur se mund t’ia dalim”, tha ylli shqiptar i futbollit.
Discussion about this post