Luiza Gega shkëlqeu në Mynih me një paraqitje fantastike në garën e 3000 m me pengesa. Atletja kuqezi, shënoi kohën 9’11”31, në një garë që e dominoi nga fillimi e deri në fund. Një rezultat i jashtëzakonshëm për Gegën dhe atletikën shqiptare, e cila u ngjit në majën e Europës.
Në një ceremoni zyrtare në Kryeministri, Edi Rama i dorëzoi sot Gegës Kordonin e madh me Yllin për Mirënjohje Publike.
Gjatë konferencës, kreu i qeverisë nuk kurseu elozhet për sportisten shqiptare e cila deri ditën e sotme ishte lënë në harresë pasi nuk kishte as kushtet më minimale të stërvitjes.
Gega stërvitej në Parkun e Liqenit artificial, ndryshe nga sportistët e tjerë nëpër Europë që marrin mbështetje maksimale nga federata dhe qeveria.
E gjithë ceremonia e sotme me Luiza Gegën ishte si një film i përsëritur, pasi të njëjtën “shfaqe” e kishim parë dhe me ish-peshëngritësin Ilir Suli.
Dikur Edi Rama i cili mbante postin e ministrit të Kulturës dhe Sportit në një ceremoni zyrtare në aeroportin e Rinasit priti me buqetë me lule dhe me premtime peshëngritësin shqiptar, Ilri Suli i sapo shpallur nënkampion bote në shtangë.
Por pas 20 vitesh, Suli u shfaq në një intervistë televizive i zhgënjyer nga politikanët madje i bëri thirrje të rinjve që të largohen sa më shpejt nga Shqipëria pasi sipas tij asnjë qeveri nuk vlerëson sportistët.
Shpresojmë që fati i Luiza Gegës mos jetë i ngjashëm me ish-peshëngritësin Ilir Sulin.
Discussion about this post