Edhe pse rrugët janë shtruar dhe rregulluar rishtazi, bashkia Korçë vazhdon të blejë çdo vit në sasi të madhe bitumi, betoni dhe materiale të tjera ndërtimi. Dhe ky fond i madh qindra milionë lekë shpërndahet nëpërmjet tenderave të manipuluar dhe korruptiv.
Këtë herë, kryebashkiaku Sotiraq Filo e ka miratuar tenderin 83 milionë lekë për bitum. Më konkretisht bëhet fjalë për prokurimin me objekt ‘Blerje asfalt mikser dhe bitum për spërkatje’ të zhvilluar nga Ndërmarrja e Shërbimeve Publike Korçë me drejtor Ilirjan Dinellarin. Ky i fundit ka përllogaritur se Korçës për 1 vit i duhen 83 milionë lekë serë e bitum, por pa e përcaktuar në dokumente se në cilat rrugë do të përdoret ky asfalt.
Nga dokumentet që disponojmë, shohim që tenderi është hapur dhe mbyllur brenda 2 javësh, plot me shkelje dhe abuzim.
Sipas të dhënave të dokumenteve, drejtor Dinellari e ka shpallur garën për këtë tender më datë 6 qershor 2024 dhe ka lënë afat për paraqitje ofertash deri më datë 18 qershor.
Vetëm firma Vashtemia SHPK ka paraqitur ofertë dhe në këto kushte procedura duhej anuluar, sepse kështu e kërkon ligji. Epo Dinëllari me mbështetjen dhe miratimin e kryetarit Filio vendosi të shpallë fituese të vetmen ofertë, pa asnjë llojë konkureence. Me propozimin që furnzimi të bëhet me 63 milionë lekë, kompania me pronarë Gëzim Avdollin dhe Servet Cenollin morën kontratën pa asnjë konkurrent përballë.
Më datë 21 qershor 2024 u bë publik emri i fituesit edhe në Agjencinë e Prokurimit Publik që e ka regjistruar në sistem pa kontrolluar më parë se çfarë skandali është bërë me këtë tender.
Ku tender duhej anuluar dhe të priteshin oferta më të përshtatshme. Dhe nëse do të kishte pjesëmarrje, jemi të sigurt se oferta fituese do të ishte më ekonomike.
Open Data Albania i e ka vlerësuar këtë prokurim me “Flamur të kuq” që është treguesi i riskut të korrupsionit.
Le ta krahasojmë këtë tender me prokurimin e zhvilluar në vitin 2022 nga bashkia Korçë, me të njëjtin objekt. Më 18 maj 2022 u zhvillua tenderi “Asfalto beton e bitum për spërkatje” me fond limit 33 333 217,00 lekë. Në tender kanë marrë pjesë 5 kompani, përfshirë firmën “Vashtemia” shpk, që edhe në atë kohë e ka fituar tenderin. Por propozimi ka qenë 100 milionë lekë më pak se fondi limit (24 227 700,00 lekë). Pra, konkurrenca e ka detyruar kompaninë në fjalë të bëjë një ofertë shumë ekonomike dhe me leverdi për bashkinë.
Fiton tenderat nuk kryen punën
Ndërkaq, vlen të kujtojmë se “VASHTEMIA” shpk është përgjegjëse për “Mirëmbajtje me Performancën e segmentit rrugor K/Podgorie – K/Liqenas”. Aksi rrugor është bërë disa herë problematik, për shkak se firma në fjalë vetëm po merr paratë, por nuk e kryen punën e mirëmbajtjes.
Edhe tek ky projekt, firma në fjalë ka fituar 600 milionë lekë në një tender të dyshimtë të firmosur nga ish-drejtori i ARRSH, Evis Berberi, që përfundoi me ankesa në Komisionin e Prokurimeve Publike. Pra, “Vashtemia” merr milionat për të mirëmbajtur rrugët, por në fakt gjendja vazhdon e njëjtë dhe ato degradohen dita ditës. Ky tender është në listën e prokurimeve abuzive të bëra nga ARRSH dhe që po hetohen nga SPAK pas arrestimit të drejtorit Berberi.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post