Bledar Cafi, 50 vjeç, është arrestuar në Shkodër gjatë operacionit të koduar “Muri i Lartë”, të zhvilluar nga Policia e Shtetit, BKH-ja dhe strukturat e tjera operacionale, nën drejtimin e SPAK. Cafi u kap në banesën e tij në orët e para të mëngjesit, ndërsa GJKKO, me vendim të datës 25 shtator 2026, kishte caktuar ndaj tij masën e sigurisë “arrest me burg” për veprat penale të trafikimit të lëndëve narkotike në bashkëpunim, në formën e grupit të strukturuar kriminal, si dhe akuza të tjera që lidhen me veprimtarinë e grupit.
Në kuadër të operacionit, autoritetet kanë ekzekutuar edhe kontrolle për lokalizimin e Indrit Dokles, 43 vjeç, i njohur edhe me aliasin I. D., lindur në Kukës dhe banues në Tiranë. Sipas Policisë së Shtetit, ai është person në kërkim që prej vitit 2024 dhe ndaj tij GJKKO ka caktuar gjithashtu masën “arrest me burg” për trafikim të lëndëve narkotike në bashkëpunim dhe pjesëmarrje në grup të strukturuar kriminal. Gjatë kontrolleve në ambientet që i përkasin tij, Dokle nuk është gjetur.
Operacioni është zhvilluar me përfshirjen e Forcave Speciale RENEA, Drejtorisë së Forcës së Posaçme Operacionale, Drejtorisë për Hetimin e Narkotikëve, Drejtorisë Vendore të Policisë Shkodër dhe BKH-së, në zbatim të urdhrit të SPAK dhe vendimit të gjykatës. Policia e Shtetit e cilëson Bledar Cafin si person me rrezikshmëri të lartë shoqërore, ndërsa vijon puna për lokalizimin dhe kapjen e Indrit Dokles. Hetimet për aktivitetin e dyshuar kriminal vijojnë nën drejtimin e SPAK.
Discussion about this post