Inspektorati i Mbrojtjes së Territorit (IMT) ka reaguar pas operacionit të zhvilluar nga Policia e Shtetit dhe SPAK, ku u arrestuan disa punonjës të institucionit për dyshime korrupsioni.
Në një komunikim zyrtar, IMT njofton se katër punonjësit e përfshirë në këtë rast janë shkarkuar nga detyra.
“Sjellje të tilla janë të papranueshme dhe IMT distancohet plotësisht nga këto veprime individuale. Masat administrative përkatëse janë marrë menjëherë, duke përfshirë shkarkimin nga detyra të personave të përfshirë,” thuhet në reagim.
Ndërkohë janë zbuluar identitetet e inspektorëve të përfshirë në operacionin e SPAK-ut. Nga hetimet rezultoi se dy punonjës janë arrestuar: Gerald Fucia dhe Edmond Çela, ndërsa dy të tjerë, Klajdi Zhilla dhe një person tjetër, janë shpallur në kërkim.
Sipas raportimeve në media, dy të arrestuarit u kapën në lokalin e ish-deputetit Mark Frroku, ku autoritetet sekuestruan edhe kamerat e sigurisë për hetime të mëtejshme. Inspektorët dyshohet se kanë marrë ryshfete nga një subjekt për tendera të ndryshëm.
Reagimi i plotë:
Marrë shkas nga ngjarja e ndodhur ditën e sotme, ku katër punonjës të Inspektoratit të Mbrojtjes së Territorit kanë shkelur rëndë ligjin, bëjmë me dije opinionin publik se institucioni ynë e dënon me vendosmëri këtë rast.
Sjellje të tilla janë të papranueshme dhe IMT distancohet plotësisht nga këto veprime individuale. Ndaj personave të përfshirë janë marrë menjëherë të gjitha masat e nevojshme administrative, duke i shkarkuar nga detyra.
IMT inkurajon organet ligjzbatuese për bashkëpunim të plotë dhe ndëshkimin e rastit sipas ligjit, si edhe inkurajon çdo qytetar të denoncojë raste të ngjashme, në mënyrë që të mos mbetet asnjë hije dyshimi mbi integritetin e institucionit dhe misionin e tij.
Discussion about this post