Prokuroria e Posaçme ka firmosur autorizimin për të lejuar familjarët të vizitojnë kryebashkiakun e Tiranës Erion Veliaj në qelitë e paraburgimit të Durrës. Veliaj u arrestua të hënën e kaluar, ndërsa të mërkurën Gjykata e Posaçme konfirmoi për kryebashkiakun masën e sigurisë Arrest me burg.
Të enjten u krye transferimi i tij nga blloku i sigurisë te Mine Peza në paraburgimin e Durrësit.
Kujtojmë se Më 10 shkurt 2025, kryebashkiaku i Tiranës Erion Veliaj u arrestua me akuzën e korrupsionit dhe pastrimit të parave. Së bashku me bashkëshorten e tij Ajola Xoxa, , Veliaj është përfshirë në një skemë të madhe dhe komplekse për pastrimin e fondeve publike dhe ryshfet nga kontraktorët përmes një sërë organizatash jofitimprurëse.
Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Biznesmenët Elman Abule, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu në këmbim të tenderave nga Bashkia e Tiranës dhe lejeve të ndërtimit, i ofronin Erion Veliajt, shuma monetare nëpërmjet blerjeve fiktive, biletave avioni, sponsorizimeve, OJF-ve të Ajola Xoxës, si dhe pasurive të paluajtshme, si disa vila në Qerret.
Pas një hetimi 1 vjeçar të SPAK, mbi Erion Veliajn janë ngritur akuzat për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Discussion about this post