Prokuroria e Posaçme Kundër Korrupsionit dhe Krimit të organizuar ka arrestuar ‘kapon’ e një rrjeti të struktura të trafikut të lëndëve narkotike, kryesisht kokainë dhe marijuanë, të cilat i dërgonte në shtetin e Norvegjisë.
Në njoftimin e SPAK theksohet se: “I hetuari F. P. ka arritur gjithashtu që të krijojë një rrjet shpërndarësish të lëndëve narkotike (kryesisht kokainë dhe mariuhana) në përbërje të të cilit janë shtetas shqiptarë, por edhe persona me shtetësi jo shqiptare. Të ardhurat e siguruara nga aktiviteti kriminal i trafikimit të lëndëve narkotike dërgoheshin tek shtetasi nën hetim F. P. dhe referentët e tjerë të tij me anë të agjencive të transferimit të parave apo edhe cash”.
SPAK bën të ditur se në bashkëpunim me autoritetet gjyqësore Norvegjeze ka vënë në pranga shtetasin me iniciale F.P, i cili drejtonte grupin e strukturuar kriminal që operonte në Norvegji. Po ashtu është arrestuar dhe një shtetase shqiptare, e cila është lënë në arrest shtëpie.
SPAK nuk bën të ditur emrat, por thekson se ajo akuzohet për pastrim parash, pjesëtarë e grupit të strukturuar kriminal. “Caktimin ndaj të hetuarës A. A. të masës së sigurimit personal me karakter shtrëngues “arrest në shtëpi”, parashikuar nga neni 237 i Kodit të Procedurës Penale, si e dyshuar për kryerjen e veprave penale të “Prodhimit dhe shitjes së narkotikëve”, kryer në bashkëpunim në formën e grupit të strukturuar kriminal, “Pastrim të produkteve të veprës penale ose veprimtarisë kriminale”, “Krijimit të grupit të strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, parashikuar nga nenet 283/1, 28/4, 287/1/2, 333/a dhe 334 të Kodit Penal”, thekson SPAK.
Nga ana tjetër edhe Autoritetet Gjyqësore Norvegjeze kanë caktuar masën e sigurimit “arrest në burg”, ndaj disa personave të cilët dyshohen se janë pjesë e të njëjtit grup të strukturuar kriminal.
Në zbatim të vendimit të Gjykatës së Posaçme të Shkallës së Parë për Korrupsionin dhe Krimin e Organizuar, Drejtoria e Përgjithshme e Policisë së Shtetit realizoi kontrollin e disa banesave dhe kontrollin personal të disa shtetasve në qytetet Tiranë dhe Lezhë. Gjatë kontrollit u gjetën dhe sekuestruan në cilësinë e provës materiale dokumente të ndryshme me interes për hetimin.
