SPAK u ka dërguar letërporosi bankave të nivelit të dytë në vend, në lidhje me transaksionet dhe llogaritë e Call Center-ave. Kjo pasi ata dyshohet se kanë mashtruar qytetarët duke u zhvatur shuma të mëdha parash online.
Mbi 1 mijë shtetas në Evropë kanë rënë preh e mashtrimit të Call Center-ave nga Tirana. Vlera totale e këtyre mashtrimeve shkon më miliona euro. Sipas burimeve bëhet me dije se janë 10 kompani të cilat kanë bërë mashtrime me vlera të mëdha. Prokurorët e SPAK pas marrjes së ankesave nga Gjermania apo dhe Holanda, pasi qytetarët e tyre ishin mashtruar nisën menjëherë hetimin.
Kanë qenë shtetet e zhvilluara evropiane ato të cilat fillimisht bënë hetim në lidhje me kompanitë ku zbuluan se adresat ‘IP’ ishin nga Shqipëria.
Gjithashtu prokuroria i është drejtuar edhe Drejtorisë së Tatimeve për të bërë bilancin e këtyre bizneseve, por edhe kompanive telefonike për thirrjet e kryera ndaj shtetasve gjermanë, holandezë, italianë dhe francez nga kanë ardhur edhe denoncimet.
Në hetim përfshihen “Call Center-at” e bursave, ku operatorët e tyre telefonojnë qytetarë të ndryshëm në Evropë duke i ftuar të investojnë. Ata u kërkojnë atyre të depozitojnë disa para, duke u premtuar se do t’i rifitojnë në vlerë edhe më të madhe. Sapo kryhet transaksioni, këta persona zhduken duke fshirë çdo të dhënë të cilën i kanë servirur klientit. Ky është një mashtrim i pastër online që ka lulëzuar gjatë viteve të fundit, duket pasuruar pronarët e këtyre bizneseve.
