SPAK i dorëzon Policisë urdhër-arrestin për Ahmetajn

SPAK i ka dorëzuar Policisë së Shtetit urdhër-arrestin për deputetin Arben Ahmetajn.

Pas caktimit nga GJKKO të masës së sigurisë, SPAK ka vijuar procedurën duke i kërkuar Policisë së Shtetit të gjejë ish-zv.Kryeministrin, që sipas raportimeve ndodhet jashtë Shqipërisë.

Nëse Policia e Shtetit nuk arrin të gjejë ish-zv.Kryeministrin, emri i Arben Ahmetajt pritet ti shtohet listës së personave të shpallur në kërkim, përfshi këtu edhe atë ndërkombëtar.

Nuk dihet se sa kohë mund ti duhet Policisë për të gjetur vendndodhjen e Ahmetajt, nëse ai ndodhet ose jo në territorin shqiptar, për të vijuar më pas me shpalljen në kërkim-ndërkombëtar.

Javën e kaluar Kuvendi miratoi autorizimin e kërkuar nga SPAK për arrestimin e Ahmetajt. Më pas ishte GJKKO që vendosi masën e sigurisë të arrestit me burg, por edhe kontrollin e banesave të deputetit.

Ndaj Ahmetajt SPAK ka ngritur 3 akuza nga pastrimi i parave, fshehja e pasurisë dhe korrupsioni, ndërsa emri i tij rezulton i përfshirë në aferën e inceneratorëve.

Ish-zv.Kryeministri, për të cilin thuhet se ndodhet në Britaninë e Madhe, ka kundërshtuar akuzat, ndërsa ka paralajmëruar se do të nxjerrë ditë pas dite të vërtetën që sipas tij e di vetëm Zoti.