SPAK ka depozituar në GJKKO kërkesën për caktimin e masës së sigurisë ndaj ish-zv.Kryeministrit Arben Ahmetaj. Sipas raportimeve, SPAK ka kërkuar në GJKKO caktimin e masës “arrest me burg” për deputetin, të cilit gjatë paradites iu hoq imuniteti, pas kërkesës së Prokurorisë Speciale që ka ngritur 3 akuza ndaj tij.
Pritet që në një seancë, GJKKO të shqyrtojë provat që do të paraqesë SPAK, por njëherëzi të dëgjojë edhe pretendimet e avokatëve të Ahmetajt.
SPAK kërkon arrestimin e Ahmetajt, pasi e akuzon atë për shpërdorim detyre, korrupsion, pastrim parash dhe përfitime të paligjshme, ndërsa ish.zv-kryeministri nuk ndodhet në Shqipëri për t’u përballur me drejtësinë. Ahmetaj thotë se do të dalë kur e vërteta sipas tij, të ketë marrë dritë dhe të lexohen të gjitha provat në favor të tij.
Ish-zëvendëskryeministri rezulton të jetë larguar nga Shqipëria dhe sipas avokatëve ai ndodhet në Britaninë e Madhe.
Ahmetaj akuzohet si i përfshirë në aferën e inceneratorëve, pasi gjatë kohës që ka qenë ministër, ka favorizuar biznesmenët Klodian Zoto dhe Mirel Mërtiri, duke marrë para prej tyre.
Përmes një reagimi në rrjetet sociale disa orë më parë, Ahmetaj shprehet se do të kërkojë drejtësinë deri në fund, ndërsa shprehet se të vërtetën e di vetëm Zoti, ndërsa ai do e zbulojë hap pas hapi.
Në anën tjetër Kryeministri Edi Rama në një reagim publik tha se i takon drejtësisë të shprehet nëse ish-zv.Kryeministri është i fajshëm apo i pafajshëm.
Discussion about this post