SPAK iu drejtua Kuvendit të Shqipërisë me një shkresë, ku e njoftonte për marrjen në pyetje të ish-Kryeministrit Sali Berisha. Shkresa e SPAK duket si një mënyrë që Kuvendi të njoftojë Berishën mbi vendimin e GJKKO-së, ku ndaj tij janë në fuqi dy masa sigurie: detyrim paraqitje dy herë në muaj para OPGJ dhe ndalim të daljes jashtë vendit.
Të dy masat janë vendosur pa një autorizim nga Kuvendi, çka ka shkaktuar reagime të forta nga ish-Kryeministri që e konsideron procedurën e ndjekur ndaj tij si një shkelje flagrante Kushtetuese.
Avokati Jordan Daci e cilëson një letër paçavure shkresën e SPAK dërguar Kuvendit për Berishën.
Në një intervistë për Euronews Albania, Albania Daci tha se në këtë fazë kur tashmë dosja ka shkuar në Apel, nuk ka pse komunikohet Kuvendi a do pyetet apo jo Berisha.
“Një person për t’u pyetur nuk ka nevojë të ketë një masë sigurie dhe kjo nuk është çështje e Kuvendit që nuk përzihet me hetimin. Tani dosja ka vajtur në Apel dhe gjykata s’e ka një vendim të dytë, vetë mënyra e ekzekutimit të këtij vendimi do vërtetonte paligjshmërinë e tij. Tani jemi në fazën që gabimi bëhet banal dhe merr trajta qesharake; nuk ka pse komunikohet Kuvendi a do pyetet apo jo Berisha, s’ka pse të ketë një vendim apo qëndrim për këtë dëftesë paçavure që ka dërguar atje”, tha avokati Daci.
Discussion about this post