Në dy seanca të zhvilluara të martën e të mërkurën, Këshilli i Mandateve dhe Imuniteteve ka shqyrtuar kërkesën e SPAK për arrestimin e deputetit Arben Ahmetaj, ish-zv.Kryeministër. Këshilli ka vendosur parimisht të miratojë kërkesën e SPAK për arrestimin e deputetit Arben Ahmetaj.
Sipas raportimeve, mësohet se deputetët socialistë i kanë dhënë dakordësinë SPAK për arrestimin dhe kontrollin e banesës së deputetit, ndërsa duhet pritur seanca plenare për miratimin përfundimtar të autorizimit.
E ndërsa Ahmetaj nuk ndodhet në Shqipëri, ai u përfaqësua në Këshill me dy mbrojtës ligjorë, Henrik Ligori dhe Ardian Visha, të cilët pretendojnë se kërkesa e SPAK bazohet në aludime dhe jo në prova.
Ndërkohë kreu i SPAK, Altin Dumani, një nga prokurorët që ka hetuar Ahmetajn, dhe prokuorja tjetër, Enkelejda Minollai, pretendojnë se deputeti ka plotësuar kriteret për tu arrestuar.
Madje sipas SPAK Arben Ahmetaj ka përfituar nga pronarët e inceneratorëve, të cilët i kanë paguar udhëtimet, apo edhe në mënyrë të tërthortë, rreth 500 mijë euro.
Pas dy seancave, i takon Këshillit për të paraqitur një ose dy raporte në seancë plenare, e cila me shumë gjasë do të mbahet ditën e hënë, në orën 17:00, bazuar edhe në propozimin e bërë nga deputetët socialistë.
Gazment Bardhi, në emër të deputetëve të opozitës, ka paraqitur në Këshill raportin, përmes të cilit i kërkohet Kuvendit që të miratojë kërkesën e SPAK, duke i hapur rrugën kështu hetimit të plotë ndaj deputetit socialist.
Bardhi edhe më herët ka vlerësuar si mjaft profesional hetimin e SPAK lidhur me Ahmetajn, veçanërisht lidhur me pasurinë, duke u shprehur se ky është një standard që duhet të vijojë.
Socialistët janë treguar të rezervuar qoftë sa i takon SPAK ashtu edhe avokatëve, duke tentuar të mbajnë një qëndrim, të paktën në dy seancat e zhvilluara, as pro as kundra.
Por më herët zyrtarë nga PS kanë deklaruar se kjo parti nuk do të bëhet mburojë për asnjë prej zyrtarëve që do të akuzohet nga SPAK.
Discussion about this post