“Plumbi i artë”, GJKKO mbyll dyert për dëshminë e Nuredin Dumanit

Dëshmitë e Nuredin Dumanit, të penduarit të drejtësisë për krimet ku a ai ka marrë pjesë do të bëhen me dyer të mbyllura.

Kështu vendosi Gjykata e Posaçme pas kërkesës së prokurores së SPAK, Doloreza Musabelliu e cila në seancën e kësaj të marte kërkoi seancë me dyer të mbyllura me argumentin se mund të dalin të dhëna për persona që janë ende në hetim, por edhe për ruajtjen e sigurisë së bashkëpunëtorëve në këtë dosje.

Kjo solli tensione në gjykatë mes të akuzuarve të Nuredin Dumanit në dosjen “Plumbi i artë” dhe prokurores.

Avokatët mbrojtës të tyre kërkuan seancë me dyer të hapura. “Pavarësisht se në seancën e parë nuk ishte kjo kërkesë, duket e çuditshme pse prokuroria ka kërkuar një gjë të tillë. Sipas ligjit, kur dosja kalon për gjykim, nuk ka me sekret hetimor” thanë ata.

I pandehuri Petrit Qoli që Nuredin Dumani ka deklaruar se e ka paguar për dy vrasje bëri të njëjtën kërkesë. “Kam 1 vit e gjysmë në burg dhe dua që fjala ime të jetë transparente dhe të bëhet me dyer të hapura”.

I akuzuari tjetër Adrian Uzuni tha se media duhej në sallë. “Unë jam baba i 3 kalamajve dhe media çfarë nuk ka shkruajtur për mua duke marrë për bazë fjalët e një mashtruesi. Unë dua që media të jetë në sallë dhe të dëgjojë. Dua vetëm drejtësi”.

Pasi dëgjoi palët, GJKKO u tërhoq për të marrë vendim në lidhje me kërkesat. Në fund Gjykata vendosi që shqyrtimi të bëhet me dyer të mbyllura, derisa të dëshmojnë tre bashkëpunëtorët e drejtësisë. Pas këtij vendimi të pandehurit dhe avokatët e tyre braktisën seancën.