Prokuroria e Posaçme (SPAK) ka zyrtarizuar statusin e të pandehurit për kryetarin e Komisionit të Prokurimit Publik (KPP), Jonaid Myzyri, duke e futur nën hetim zyrtar për vepra penale që lidhen me proceset e tenderimit publik.
Burime nga SPAK bëjnë me dije se Jonaid Myzyri pritet të paraqitet të hënën e ardhshme, 30 qershor, në ambientet e prokurorisë së posaçme, i shoqëruar nga avokati i tij Ermir Beta, për t’u njohur zyrtarisht me akuzat dhe për të dhënë shpjegime si i pandehur.
Mësohet se Myzyri është marrë i pandehur për dy vepra penale: “Shkelje e barazisë në tendera” dhe “Shpërdorim detyre”. Hetimet e SPAK-ut janë përqendruar në procedurat e tenderave të zhvilluara gjatë viteve 2020-2023, ku prokuroria ka ngritur dyshime të forta për zhvillimin e tyre në mungesë të garës së lirë. Sipas hetimeve, në shumë raste ka rezultuar pjesëmarrëse vetëm një kompani, ndërsa në raste të tjera, shoqëritë konkurrente janë skualifikuar në mënyrë të padrejtë. Çështja po hetohet nga prokurori i SPAK, Elvin Gogaj.
Burime të besueshme bëjnë me dije se Jonaid Myzyri po hetohet në lidhje me një tender specifik për mirëmbajtjen e aksit rrugor me vlerë rreth 2 miliardë lekë, që përfshin segmentet “Rrëshen (U.Fanit) – Shpal, Shpal – Q.Bene – K.Hadroj, Shpal-Ura e Repsit”, me një gjatësi totale prej 58.7 kilometrash.
Gjithashtu, një tjetër fokus i hetimeve të SPAK ndaj Jonaid Myzyrit është shqyrtimi dhe përfshirja e tij në vendimmarrjen për ankimet mbi prokurimet publike të kryera nga institucione të larta të Sigurisë Kombëtare, përfshirë Drejtorinë e Sigurimit të Informacionit të Klasifikuar. Sipas informacioneve të siguruara, Myzyri nuk rezulton të jetë i pajisur me certifikatë sigurie të nevojshme për të shqyrtuar informacione të klasifikuara, dhe si rrjedhojë, do të duhej të ishte përjashtuar nga vendimmarrja për ankimet mbi tenderat specifikë të këtyre institucioneve. Megjithatë, dyshohet se ai ka shqyrtuar dhe votuar mbi këto procedura, duke shkelur ligjin.
Mediat kanë raportuar gjithashtu se kreu i KPP-së është nën hetim nga SPAK edhe për favorizimin e dyshuar të kompanisë NRG, e cila ka si pronarë italianin Marco Genicco dhe bashkëshorten e tij shqiptare, Flutura Nuredini. Kjo kompani është gjithashtu nën hetim të thelluar nga Prokuroria e Tiranës për kontrabandë medikamentesh, të cilat përdoren për spërkatjen kundër mushkonjave.
Jonaid Myzyri ka qenë më parë në Prokurorinë e Posaçme, ku është thirrur nga prokurori Elvin Gogaj për të dëshmuar në lidhje me hetimet që po zhvillohen ndaj tij.
Nga ana tjetër, bëhet e ditur se Jonaid Myzyri kishte shprehur interesin për të kandiduar për një mandat të dytë në krye të Komisionit të Prokurimit Publik. Ai u emërua në këtë post në vitin 2020 për një mandat 5-vjeçar. Në janar 2025, Parlamenti shpalli thirrjen për garën e re për kryetar të KPP-së, ku Myzyri ishte një nga tre kandidatët. Pas vlerësimit nga Këshilli i Ministrave në mars 2025, ai kishte marrë pikët më të larta, duke krijuar pritshmëri për një rizgjedhje. Megjithatë, me marrjen zyrtarisht të statusit të të pandehurit nga SPAK, mundësia e tij për një mandat të dytë në krye të KPP-së duket se është zvogëluar ndjeshëm, pasi ligji për “Prokurimet Publike” kërkon që kandidatët të mos jenë nën procedim penal.
Discussion about this post