SPAK ka nisur hetimet për të zbuluar një spiun nga rradhët e tij, ose nga institucione të tjera, që kanë pasur dijeni për arrestimin e ish-Kryebashkiakut Vangjush Dako.
Sipas një njoftimi zyrtar, SPAK bën të ditur se ka nisur hetimet për kryerjen e veprës penale ”zbulimi i akteve ose të dhënave sekrete”, të parashikuar nga neni 295/a i Kodit Penal.
Fillimi i hetimeve kryesisht për këtë vepër penale është bërë për shkak të zbulimit ndaj të tretëve të të dhënave dhe të përmbajtjes së akteve procedurale, të cilat përbëjnë ”sekret hetimor”, që lidhen me veprimet procedurale të paraqitjes dhe të shqyrtimit të kërkesës me objekt caktimin e masave të sigurimit në ngarkim të shtetasve V.D etj, të kryera në kuadër të procedimit penal nr.197 viti 2020 të Prokurorisë së Posaçme.
Objekt i hetimeve do të jenë veprimet e të gjithë personave të përfshirë në kryerjen e veprimeve procedurale për caktimin e masave të sigurimit për procedimin penal nr.197 viti 2020, duke përfshirë funksionarët e drejtësisë, personelin administrativ të organeve procedurale, si dhe çdo person tjetër që ka marrë dijeni për veprimet procedurale për shkak të funksionit të tij, të cilët mundet të kenë zbuluar të dhënat sekrete ndaj personave të tretë.
Dhe u zbatua urdhër-arresti ndaj ish-Kryebashkiakut Dako, ndërsa prej 4 ditësh njoftohej në media se ky arrestim pritej. Tashmë SPAK do të duhet të hetojë se kush nga personat që ka pasur dijeni lidhur me çështjen ka publikuar aktet që konsiderohen sekret.
Discussion about this post