SPAK urdhëron kontrolle në banesën e ish-kreut të Policisë së Tiranës, Ilir Proda

Prokuroria e Posaçme ka nisur kontrolle në banesën e Ilir Prodës, ish-Drejtor i Përgjithshëm i Policisë së Shtetit. Veprimet po kryhen me vendim të Gjykatës së Posaçme Kundër Korrupsionit dhe Krimit të Organizuar, e cila ka autorizuar kontrollin e banesës dhe kontrollin personal të Prodës.

Sipas informacioneve të publikuara, emri i ish-kreut të Policisë së Shtetit ka dalë gjatë një hetimi që po zhvillon Prokuroria e Posaçme. SPAK nuk ka bërë ende publik se për cilën dosje bëhet fjalë dhe në çfarë rrethanash ka dalë emri i Prodës gjatë hetimit.

Aksioni nuk është kufizuar vetëm te ish-drejtori i Policisë së Shtetit. Hetuesit po ushtrojnë kontrolle edhe në banesat e personave të tjerë, por deri tani nuk janë bërë publikë emrat e tyre dhe lidhja që kanë me procedimin.

Kjo lëvizje merr rëndësi për shkak të pozicionit që Ilir Proda ka mbajtur në strukturat e Policisë së Shtetit. Proda mori drejtimin e Policisë së Shtetit në tetor 2024, pasi më parë kishte drejtuar Policinë e Elbasanit. Pikërisht gjatë periudhës së tij në Elbasan, SPAK zhvilloi disa hetime ndaj grupeve të strukturuara kriminale që vepronin në këtë qark.

Emri i Prodës është përmendur edhe më parë në raportimet që lidhen me veprimet hetimore të SPAK. Në vitin 2024,  u raportua se atij i ishte sekuestruar telefoni nën dyshimet për dekonspirimin e një operacioni ndaj një grupi kriminal.

Zhvillimi i fundit vjen në një periudhë kur SPAK ka intensifikuar hetimet ndaj krimit të organizuar dhe lidhjeve të tij me struktura shtetërore. Vetëm gjatë periudhës 1 janar-15 korrik 2026, Prokuroria e Posaçme raportoi 551 procedime aktive dhe 13 procedime që përfshinin 16 zyrtarë ose ish-zyrtarë të nivelit të lartë dhe drejtues institucionesh.

Kreu i SPAK, Klodjan Braho, deklaroi më 21 shtator se hetimet e Prokurorisë së Posaçme kanë siguruar informacion mbi mënyrën se si organizohen grupet kriminale, lidhjet që krijojnë dhe mënyrën se si lëvizin përfitimet e tyre.

Megjithatë, SPAK nuk ka bërë ende publik nëse kontrollet në lidhje me Ilir Prodën lidhen me hetime të tilla apo me një dosje tjetër.

Sipas informacioneve, kontrolli lidhet me çështjen e Ergys Agasit dhe Uljan Shpatarakut, pasi në telefonin e këtij të fundit janë gjetur disa komunikime.

Mësohet se Ilir Prodës, i është sekuestruar aparati i telefonit, një lap-top dhe disa USB dhe CD.