Prokuroria e Posaçme ka pushuar çështjen për kryebashkiakun e Libohovës, Leonard Hide, i akuzuar për shpërdorim detyre.
Në seancën që u zhvillua mëngjesin e kësaj të hëne, SPAK tha se në dosjen për kryebashkiakun Hide nuk janë gjetur prova që tregojnë se, në kohën kur ushtronte detyrën si shef në Sektorin e Krimeve në Gjirokastër, të ketë lejuar kultivimin e kanabisit.
Megjithatë, vendimin final për pushimin e çështjes do ta japë gjykata. Pak kohë më parë, SPAK shtyu zhvillimin e seancës për Hiden për të marrë kohë për t’u shprehur në lidhje me çështjen.
Ai mori mandatin e kryebashkiakut pas zgjedhjeve lokale të 14 Majit 2023.
Hetimet për rastin janë kryer fillimisht nga Prokuroria e Gjirokastrës, që ka pasur në qendër kultivimin e kanabisit. Sipas hetimeve paraprake, Hide, si drejtues i policisë, ka shpërdoruar detyrën duke lejuar kultivimin e bimëve narkotike. U ngritën dyshime gjithashtu se së bashku me pjesëtarë të tjerë të policisë, ish-shefi i krimeve ka përfituar para në kërkim të mbrojtjes policore për trafikantët e drogës.
Pasi Hide ka marrë postin e kryebashkiakut të Libohovës, prokuroria e Gjirokastrës shpalli kompetencë dhe e dërgoi dosjen te SPAK.
Tashmë, Prokuroria e Posaçme ka konkluduar se nuk ka prova që të inkriminojnë kryebashkiakun socialist.
Discussion about this post