Prokurori Ndini Tavani nuk ka marrë dritën jeshile nga SPAK për t’iu bashkuar Strukturës së Posaçme, pavarësisht përzgjedhjes së tij nga Këshilli i Lartë i Prokurorisë.
Të Enjten e 7 Dhjetorit, Këshilli i Lartë i Prokurorisë zhvilloi procedurat e përzgjedhjes së kandidaturave për tre vendet vakante në Prokurorinë e Posaçme. Fituesit ishin Ols Dado, Anita Jella dhe Ndini Tavani.
Pas miratimit nga KLP, sipas procedurës, emrat i janë përcjellë SPAK-ut për kontroll pasurie dhe figure.
Konfirmimin nga komisioni i Prokurorisë së Posaçme e mori i pari Ols Dado, deri në atë kohë me detyrë pranë SPAK si i komanduar. SPAK i përcolli më pas Këshillit të Lartë të Prokurorisë viston për emërimin e tij në Strukturën e Posaçme dhe në mbledhjen e 7 Marsit, KLP miratoi vendimmarrjen.
Një njoftim i Këshillit të Lartë të Prokurorisë këtë të martë zbuloi se edhe kandidatja tjetër Anita Jella ka marrë pëlqimin e SPAK për tu emëruar pranë kësaj strukture, ndërsa Ndini Tavani jo.
Sipas rendit të ditës së njoftuar nga zyra e shtypit pranë KLP-së, këshilli do të diskutojë dhe votojë për zëvendësimin e Ndinit me Bledar Maksutin, i cili u rendit i katërti nga KLP në procedurën për plotësimin e tre vakancave.
Në mbledhjen e nesërme, KLP ka futur në rend dite edhe diskutimin dhe miratimi i projektaktit “për pezullimin nga detyra të prokurorit Aurel Zarka” – ish-kryeprokurori i Vlorës i arrestuar një ditë më parë me urdhër të Prokurorisë së Posaçme.
Discussion about this post