Prokuroria e Posaçme Kundër Korrupsionit dhe Krimit të Organizuar ka vendosur sekuestrimin e pasurive të nipit të deputetit të Partisë Socialiste, Redjan Rraja dhe familjarëve të tij.
Në pasurinë e konfiskuar bëjnë pjesë një apartament me sipërfaqe 76m2 në Tiranë. Dy njësi Tregtare, në Tiranë, dy garazhe, dy automjete të tipit “Audi-A8”, një automjet “Bentley” tipi Continental”, një orë dore “Rolex” dhe 2750 euro.
Vendimi i gjykatës është ekzekutuar nga Drejtoria e Përgjithshme e Policisë së Shtetit në bashkëpunim me Agjencinë e Administrimit të Pasurive të Sekuestruara dhe Konfiskuara.
Hetimet vazhdojnë me qëllim evidentimin e pasurive të tjera që shtetasi R.Rraja dhe persona të tjerë të lidhur mund të kenë në zotërim apo në pronësi.
34-vjeçari i njohur me pseudonimin “Dara” për shkak të profesionit si stomatolog, akuzohet nga prokuroria si një nga atentatorët ndaj prokurorit Arjan Ndoja, që mbeti i plagosur më 1 nëntor 2019 në mbikalimin e Shkozetit, teksa ishte në makinë me Landi Muharremin, një person me precedentë penalë, dhe shoferin e tij Andi Maloku, i cili ndërroi jetë në spitalin e Traumës.
Në makinën që autorët braktisën por që nuk mundën të djegin pasi dyshohet të mos u jetë hapur bagazhi ku kishin shishet me benzinë, u gjetën ndër të tjerë një palë syze mbi të cilat pati gjurmë gishtërinjsh që i korrespondojnë Redjan Rrajës, nga Nikla e Fushë-Krujës.
Discussion about this post