“SPAK ta hetojë”, aktivisti denoncon ministrin e Brendshëm: Transporton fletushka të PS me makinën e shtetit

Drejtuesi i lëvizjes “Qëndresa Qytetare”, Rigels Xhemollari ka denoncuar Ministrin e Brendshëm, Ervin Hoxha për krim zgjedhor.

Hoxha është filmuar duke transportuar një pako me fletushka që besohet se i përkasin fushatës elektorale të Partisë Socialiste. Ndërkohë që Xhemollari, i cili ka shpërndarë pamjet në rrjetet sociale, i bën thirrje SPAK-ut të hetojë këtë rast që sipas tij përbën shkelje të ligjit dhe dënohet me burg.

“SPAK të nisë hetim për ministrin e brendshëm Ervin Hoxha. Në shkelje të hapur, ministri i brendshëm Ervin Hoxha përdor makinën e shtetit (me targa të evidentuara) dhe Gardën e Republikës në njësinë nr. 1 në Tiranë.

Përdorimi i makinës dhe shoqërimi nga Garda jashtë orarit të punës, por në shërbim të ministrit si kandidat për deputet i PS, me fletushka që mbajnë simbole të PS si numri 5, përbën vepër penale dhe dënohet me burg. Dorëheqja nuk duhet të diskutohet, por ky krim zgjedhor duhet të hetohet dhe të shërbejë si shembull për çdo zyrtar tjetër”, shkruan Xhemollari.