Deputeti i Partisë Demokratike, Ervin Salianji tha se SPAK duhet të bëjë një hetim të shpejtë për skandalin e sistemit TIMS, për shkak se aty morën të drejtën e aksesit edhe persona jashtë policisë së shtetit.
Ai u shpreh se komisioni hetimor në lidhje me të dhënat e sistemit TIMS, i ka kaluar pritshmëritë, duke faktuar ndërhyrjet në sistem.
Sipas tij kjo përveçse është një aferë e jashtëligjshme, ka vënë në rrezik dhe ka cënuar edhe sigurinë kombëtare.
“Komisioni i TIMS ka tejkaluar pritshëmritë për t’i shërbyer publikut. Nuk kemi pasur më parë asnjë lëvizje nga qeveria, por vetëm propagandë. Pas ngritjes së komisionit hetimor kemi arretuar një drejtor dhe janë nën hetim zyrtarët e policisë së shtetit.
Drejtori i IT, Ervin Muça nuk përmbushte kushtet për këtë pozicion pune. Ai ishte proceduar në 2007 në Itali për falsifikim dokumentash, nuk ishte i pajisur me certifikatë sigurie, i është refuzuar në 2008 leja e qëndrimit, ka qenë i punësuar njëherësh edhe në Kadastër.
Sot jemi në një situatë ku drejtori i departamentit të IT në policinë e shtetit, edhe pse ka masë sigurie, është në arrest shtëpie, i pezulluar është ende drejtor, që në rastin e TIMS është më i rëndësishëm për të ruajtur dhe mbrojtur të dhënat. Kjo e bën jo efektive punë e drejtësisë dhe i mbivendoset rasteve ku nuk i pëlqen Edi Ramës dhe PS, vendimet e gjyqësorit nuk vlejnë. Persona privat që nuk ushtrojnë një detyre shtetërore aksesojnë në sistemin TIMS. Është emergjente që gjithçka që nuk u arrit të bëhej në Komisionin Hetimor, të bëhet duke përsëritur thirrje për të pasur një hetim të shpejt nga SPAK për të mos pas problematika të mëtejshme. Mundet dhe veprimtaria e SPAK të dëmtohet nga ky sistem lidhur me personat e shpallur në kërkim.
Sistemi TIMS përbën një shumëllojshmëri të dhënash, dhe aksesi i lirë nga këta persona, bën rrezik serioz për rendin dhe sigurinë dhe për të ekspozuar të dhëna të parterëve të huaj që mund të përdoren nga shtetet jo miqësore me Shqipërinë.
Në këtë situatë, qoftë ministri, ish-ministri apo dhe drejtues të lartë të Policisë së Shtetit, ishin në dijeni dhe nuk janë nxitur për marrjen e masave urgjente apo kryerjen e hetimeve të thelluara për ndërhyrjet në sistemin TIMS.
Nga të dhënat, rezulton që punonjës që duhet të ruanin të dhënat, ia kanë dhënë elementëve të krimit të organizuar, për masat ndaluese, të shpallur në kërkim, etj. Dhe për marrjen e këtyre informacioneve kanë dhënë shumë të mëdha parash për të marr të dhëna për ata vet apo kundërshtarët. Të dhënat u kanë shërbyer grupeve kriminale për të bërë eliminimin e kundërshtarëve apo për tu arratisur kur kanë pasur urdhër arreste.
Kemi depozituar të gjithë të dhënat që kemi për shkak se Parlamenti e ka detyrim të çojë raportin në këtë institucuon, jemi në dispozicion për hetim të plotë të kësaj ngjarje. Rrumbullakun pasi e përdorën politikisht mirë e mirë e më pas e flakën në rrugë. Do ta ndjekim me vëmendje se si do të shkojë problematika e sistemit TIMS”, tha Salianji.
Discussion about this post